(*** සිටිනාමළුව - අනීෂා මානගේ)

රටේ ජනාධිපති තම වැටුප කොරෝනා අරමුදලට පරිත්‍යාග කරද්දී ලු‍ණු සංස්ථාවේ සභාපතිවරයා සංස්ථාවේ මුදලින් රුපියල් ලක්ෂ දෙකක් වටිනා ජංගම දුරකතනයක් මිලදී ගෙන ඇතැයි ද තංගල්ල නගර සභාවේ මන්ත්‍රී චින්තක කැළුම් (ජවිපෙ) මහතා පැවැසීය.

චින්තක කැළුම් මහතා මෙසේ පැවසූයේ පෙරේදා (16) පැවැති තංගල්ල නගර සභාවේ ජූනි මස සභාවාරයේදීය.
මන්ත්‍රීවරයා මෙසේද කීය.

ලු‍ණු සංස්ථාවේ සභාපති ලු‍ණු සංස්ථාවේ මුදල් රුපියල් ලක්ෂ දෙකකින් ඔහු ජංගම දුරකතනයක් අරගෙන තිබෙනවා. අපේ රටේ ජනාධිපති තමන්ගේ මාස තුනක වැටුප කොරෝනා අරමුදලට පරිත්‍යාග කළා. නමුත් එතුමා පත්කළ නියෝජිතයෙක් මෙහෙමයි කරන්නේ. මේවා සම්බන්ධයෙන් තංගල්ල නගර සභාවේ මන්ත්‍රීවරු කතා කරන්නේ නැහැ. ජනාධිපතිට, අගමැතිට මේවා පේන්නෙ නැද්ද? මෙතුමා සමඟ පත්කළ අනිත් අධ්‍යක්ෂවරුත් මේවා අනුමත කරනවාද?  

ලු‍ණු ලේවාය හම්බන්තොට දිස්ත්‍රික්කයේ අපිට තිබෙන ජාතික සම්පතක්. සභාපතිවරයකුට දුරකතනයක් ගන්න අයිතියක් තිබුණත් ලක්ෂ දෙකක දුරකතනයක් ගැනීම ගැටලුවක්.

හම්බන්තොට මහ නගර සභාවට ලු‍ණු සංස්ථාවෙන් වරිපනම් ගෙවනවා.
අප මේ සම්බන්ධයෙන් හම්බන්තොට ලු‍ණු ලේවායේ සභාපති නීතිඥ නිශාන්ත සඳබරණ මහතාගෙන් කළ විමසීමේදී මෙසේ කීය.

මට සභාපති විදියට ජංගම දුරකතනයක් සහ ලැප්ටොප් පරිගණකයක් ගත හැකියි. ආයතනයේ තොරතුරු මොනිටර් කිරීම පහසු වන පරිදි සීසීටීවී, ජීපීආර්එස් සියලු‍ පහසුකම් සහිත රුපියල් 1,95,000ක ජංගම දුරකතනයක් මම ගත්තා.

මම මේ තනතුරෙන් ඉවත් වී යන දිනෙක ඒ දුරකතනය බාරදීම හෝ ඒ මුදල් ගෙවිය යුතුයි. මගේ පෞද්ගලික තොරතුරු ජංගම දුරකතනයේ තිබෙන නිසා මම දුරකතනය බාර නොදී ඒ මුදල් ගෙවනවා. ගෙවන්න මුදල් නොමැති නිසා මම පරිගණකයක් ගත්තේ නැහැ.

කිසිදු මන්ත්‍රීවරයකුගේ නමට මම ලු‍ණු පර්මිට් ලබා දී නැහැ. සංස්ථාවේ සියලු‍ තොරතුරු පොත්පත්වල නියමිත පරිදි සටහන් වී තිබෙනවා. මා සමඟ පෞද්ගලික තරහ තිබෙන අය මගේ නම කැත කරන්න උත්සාහ කරනවා. කොරෝනා කාලයේදී මගේ පෞද්ගලික වාහන පවා සේවකයන්ගේ ප්‍රවාහන පහසුකම් වෙනුවෙන් දුන්නා. රන්නේ පිහිටි මගේ නිවෙසත් මම නිරෝධායන මධ්‍යස්ථානයකට දුන්නා. තංගල්ල නගර සභාව කටකතා සහ කේළම් පමණක් කියන ස්ථානයක් බවට පත්වීම ගැන මම කනගාටු වෙනවා යැයිද කීවේය.