(එස් හේරත්  )

සපත්තු නිශ්පාදන කර්මාන්ත ශාලාවකින් රුපියල් නව ලක්ෂ පනස් හතර දහස් හත්සිය පනහක් වටිනා  කාන්තා සපත්තු ජෝඩු 355ක් සොරකම් කළ පුද්ගලයෙකු  සපත්තු සමග මාදම්පේ පොලීසිය විසින් අත්අඩංගුවට ගෙන ඇත.

අත්අඩංගුවට ගන්නා ලද සැකකරු අවුරුදු හතළිස් නවයක් (49) වයසැති මාදම්පේ පැරණි නගරයේ පදිංචිකරුවෙකි. 

මෙම සොරකම සිදු  වී ඇත්තේ මාදම්පේ පැරණි නගරයේ කාන්තා පාවහන් නිෂ්පාදනය කරනු ලබන කර්මාන්ත ශාලාවකය. 

රාත්‍රී කාලයේ කර්මාන්ත ශාලාවේ ජනේලයක් කඩා කර්මාන්ත ශාලාව තුළට ඇතුළු වී ඇති සැකකරු  සපත්තු තොගය සොරා ගෙන ඇතැයි පොලිසිය පවසයි.

මාදම්පේ පොලීසියේ අපරාධ විමර්ශන අංශයට ලැබුණු  තොරතුරක් අනුව ක්‍රියාත්මක වූ එම අංශයේ  පොලිස් නිලධාරීන් කණ්ඩායමක් විසින්  පරීක්ෂණයක් සිදුකර  සඟවා තිබූ සපත්තු තොගයද  සමඟ සැකකරු අත්අඩංගුවට ගෙන ඇත. 

සොරාගන්න ගන්නා ලද සපත්තු තොගය  පසුව අලෙවි කිරීමේ අරමුණින්  මෙම සපත්තු තොගය  සඟවා තබන්නට ඇතැයි පොලිසිය පවසයි. පොලිසිය අත්අඩංගුවට ගන්නා ලද  සපත්තු තොගය සමග සැකකරු හලාවත  අධිකරණය වෙත ඉදිරිපත් කිරීමට නියමිතය.