(සුජිත් හේවාජුලිගේ)

රත්නපුර පැල්මඩුල්ල ප්‍රදේශයෙන් මෑතකදී හමුවූ විශාලතම ප්‍රමාණයේ මැණික ඇතුළු මැණික් ගල් රැසක් චීනයේ ෂැන්හයි නගරයේ ළඟදී පැවැත්වීමට නියමිත ලෝ ප්‍රකට මැණික් වෙන්දේසියේ අලෙවි කිරීම සඳහා රැගෙන යෑමට සියලු කටයුතු සූදානම් කර ඇතැයි මැණික් හා මැණික් ආශ්‍රිත කර්මාන්ත රාජ්‍ය අමාත්‍ය ලොහාන් රත්වත්තේ මහතා පැවැසීය.

මේ සඳහා වෙනම ගුවන් යානයක්ද සූදානම් කරන බවත් මෙරට මැණික් ව්‍යාපාරිකයන් විසිපස් දෙනෙකුද එම ගමනට සම්බන්ධ කර ගන්නා බවත් හෙතෙම සඳහන් කළේය.

තමාද අදාළ රාජ්‍ය ඇමැතිවරයා විදිහට එම ගමනට සූදානමින් සිටින බවද රත්වත්තේ මහතා පැවසුවේය.

මෙරටින් මෑතකදී හමුවූ විශාලතම මැණික ඇතුළු මැණික් ගල් එම මැණික් ගල් හිමිකරුවන්ගේද එකගත්වය ඇතිව කඩිනමින් විකිණීමට කටයුතු කරන්නැයි ජනාධිපති ගෝඨාභය රාජපක්ෂ මහතාද රාජ්‍ය ඇමති ලොහාන් රත්වත්තේ මහතාට පසුගියදා උපදෙස් දුන්නේය.

රත්නපුර පැල්මඩුල්ල ප්‍රදේශයේ පෞද්ගලික පතලකින් හමුවූ එම මැණික ලෝකයෙන් මෙතෙක් හමුවූ විශාලතම ආරුනූල් සමූහය ලෙස සැලකේ.

එම මැණිකේ වටිනාකම තක්සේරු කිරීමටද මේ දිනවල කටයුතු කරගෙන යන බව රාජ්‍ය අමාත්‍ය ලොහාන් රත්වත්තේ මහතා වැඩිදුරටත් කීවේය.

එම විශාලතම මැණික සම්බන්ධයෙන් ලෝකයේ රටවල් ගණනාවකින් දැනටමත් විමසීම් කර ඇතැයි මැණික් හා මැණික් ආශ්‍රිත කර්මාන්ත රාජ්‍ය අමාත්‍යංශය පවසයි .