සිරස "සුපර් ස්ටාර්" තරු මාවතේ පැමිණි සුපිරි තරුවක් වූ සංඛ දිනෙත් ගායකයෙකු හා සංගීතඥයෙකු ලෙස වර්තමානයේ සංගීත ක්ෂේත්‍රය තුළ ජනප්‍රිය වී සිටියි. දැනට ජනප්‍රිය ගීත කිහිපයක්ම එළිදක්වා ඇති සංඛ මේ දිනවල සිය අලුත්ම ගීතය හා මියුසික් විඩියෝව එළිදක්වා තිබේ. දැනට ඉහළ රසික ප්‍රතිචාර මෙම ගීතයට ලැබෙන අතර, සංඛ ඒ පිළිබඳව අපට තොරතුරු පැවසුවේ මේ අයුරිනි.

"ජනවාරි මාසේ පැවති මගේ "සංඛ දිනෙත් ලයිව් ඉන් කොන්සට්" ප්‍රසංගයෙන් පස්සෙ තමයි මගේ අලුත්ම ගීතය වූ "රෝස කල්පනා" එළිදැක්වූයේ. මෙහි පද රචනාව ෂෙහාන් ගලහිටියාවගේ. සංගීතය නිර්මාණය කළේ මම. මියුසික් වීඩියෝව තිසුර ඉඹුලාන තමයි නිර්මාණය කළේ. රඟපෑවේ ධනුක ඩිල්ශාන් හා දසුන් පතිරණ දෙන්නා. මේ ගීතයේ ඕඩියෝව වගේම වීඩියෝවත් මම එක්වරම නිකුත් කළා. දැනට මේ ගීතය බොහෝ රූපවාහිනී නාළිකා වල ප්‍රචාරය වෙනවා. ඒ වගේම මේ ගීතය අන්තර්ජාල වෙබ් අඩවි වලින්ද රසවිඳින්න පුළුවන්. මේ ගීතයෙන් පස්සෙ තාමත් අලුත් ගීතයකට යන්න මගේ සූදානමක් නැහැ. මොකද මේ ගීතයට දැනටමත් ඉහළ රසික ප්‍රතිචාර ලැබෙන නිසා. ඒ වගේම මගේ "සංඛ දිනෙත් ලයිව් ඉන් කොන්සට්" ප්‍රසංගය නැවත වරක් පවත්වන්න කියලා ලංකාවේ බොහෝ විශ්වවිද්‍යාල වලින් ආරාධනා ලැබෙනවා. ජනවාරි මාසේ පැවති මගේ පළමු "සංඛ දිනෙත් ලයිව් ඉන් කොන්සට්" ප්‍රසංගය නරඹන්න 2000කට වඩා වැඩි පිරිසක් සහභාගී වුණා. එහිදී ලැබුණ රසික ප්‍රතිචාරත් එක්ක මම බලාපොරොත්තු වෙනවා මේ ප්‍රසංගය ඉදිරියට පවත්වන්න"

 බුද්ධික සේනාධීර