ගම්පහ රතුපස්වල දී පිරිසිදු පානීය ජලය ඉල්ලූ ප්‍රදේශවාසීන්ට යුද යමුදාවෙන් කළ වෙඩි තැබීමෙන් හා පහර දීමෙන් තුවාල ලැබූ 33 දෙනකුට වන්දි ලබා දීම අනුමත වී ඇතැයි ජනාධිපති ලේකම් කාර්යාලයය කියයි.

තුවාල ලැබූවන්ගෙන් අයදුම් පත් ප්‍රාදේශීය ලේකම් කාර්යාලයය හරහා කැඳවා ඔවුන්ගේ තොරතුරු පරීක්ෂා කළ වන්දි මුදල් ගණන තීරණය කළ බව ද ජනාධිපති ලේකම් කාර්යාලයය සඳහන් කරයි.

පූර්ණ ආබාධිත ගම්වැසියකුට රුපියල් හත් ලක්ෂ පනස් දහසක වන්දි මුදලක් අනුමත වී තිබේ. වන්දි ලබා දීමට වැය කරන මුලු මුදල ලක්ෂ 46කි.

තුවාල ලැබූවන්ට වන්ධි ප්‍රදානය කිරීම මෛත්‍රීපාල සිරිසේන මහතාගේ ප්‍රධානත්වයෙන් ලබන සිකුරාදා (08) සිදු කිරීමට නියමිත බව ද ජනාධිපති ලේකම් කාර්යාලයය සඳහන් කරයි.

රතුපස්වලට සහන සලසා දෙන ලෙස ශ්‍රී ලංකා තරුණ ජනමාධ්‍යවේදීන්ගේ සංගමය ජනාධිපති ලේකම් කාර්යාලයයෙන් කළ ලිඛිත ඉල්ලීමක් අනුව පසුගිය වසරේ දෙසැම්බර් 15 වැනි දා ජනාධිපති සම්බන්ධීකරණ ලේකම් ශිරාල් ලක්තිලක මහතා සමග සාකච්ඡාවක් පැවැත්විණි. එම සාකච්ඡාවට සියනෑ පරිසරය සුරැකීමේ ඒකාබන්ධ සංවිධානයේ ප්‍රධාන සංවිධායක සුරේෂ් පෙරේරා ඇතුළු පිරිසක් ද සහභාගී වූහ.

එම සාකච්ඡාවේදී ගත් තීරණ ශිරාල් ලක්තිලක මහතා විසින් මෛත්‍රීපාල සිරිසේන ජනපතිට දැනුම් දීමෙන් පසු ජනපතිගේ උපදෙස් පරිදි රාජ්‍ය නිලධාරීන් කැඳවා විශේෂ සාකච්ඡාවක් පවත්වා රතුපස්වලට සහන සැලසීමට තීරණය කළේය.

ඒ අනුව ඊයේ (05) දිනට පෙර සහන සැලසීමට එම රැස්වීමේදී එකඟ විය.

ප්‍රදේශවාසීන්ට පටැලැවූ බොරු නඩු බවත් කිරීමට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති පූජිත ජයසුන්දර මහතාට පවරා ඇති බවත්, ඒ කටයුතු මේ දිනවල සිදුවෙමින් පවතින බවත් ජනාධිපති ලේකම් කාර්යාල ප්‍රකාශකයෙක් කීවේය.