ගම්පහ රතුපස්වල ජල ගැටළුවට විසඳුම් ඉල්ලා උද්ඝෝෂණය කළ ප්‍රදේශවාසීන් පිරිසකට වැලිවේරියේ දී වෙඩි තැබීම සම්බන්ධයෙන් මේ වන විට අසූ දෙනකුගෙන් පමණ ප්‍රකාශ සටහන්කරගෙන ඇතැයි අපරාධ පරීක්ෂණ දෙපාර්තමේන්තුව ඊයේ (18) ගම්පහ ප්‍රධාන මහේස්ත්‍රාත් කාවින්දා නානායක්කාර මෙනවියට දැනුම් දුන්නේය.

යුද හමුදා වෙඩි  තැබීමෙන් සහ පහර දීමෙන් පාසල් සිසුන් දෙදෙනකු ඇතුළු තිදෙනකු මිය ගොස් විශාල පිරිසක් තුවාල ලැබූහ.

එම සිද්ධිය සම්බන්ධ නඩුව ඊයේ (18) කැඳවූ අවස්ථාවේ රහස් පොලිසිය වැඩිදුර වාර්තාවක් මගින් මාධ්‍යවේදීන් ඇතුළු හය දෙනකුගෙන් ලබා ගත් කටඋත්තරවල උදෘත අධිකරණයට ඉදිරිපත් කළේය.

වෙඩි තැබීම සම්බන්ධයෙන් මුල් පරීක්ෂණ කොළඹ අපරාධ කොට්ඨාසය සිදු කළ බවත්, ඉන් පසු නීතිපති විසින් වැඩිදුර විමර්ශන සඳහා අපරාධ පරීක්ෂණ දෙපාර්තමේන්තුවට යොමු කරනු ලැබූ බවත් රහස් පොලිසියේ විශේෂ විමර්ශන අංශයේ ස්ථානාධිපති ප්‍රධාන පොලිස් පරීක්ෂක රංජිත් මුණසිංහ මහතා අධිකරණයට දැනුම් දුන්නේය.

විමර්ශනවල දැන් තත්ත්වය ගැන විනිසුරු නානායක්කාර මෙනවිය කළ විමසීමේදී රහස් පොලිසිය කීවේ රාජ්‍ය නිලධාරීන් පිරිසකගේ ප්‍රකාශ සටහන් කර ගැනීමට තිබෙන බවයි.

ඉදිරි විමර්ශන කර කරුණු වාර්තා කිරීමට නඩුව මැයි 6 වැනි දාට කල් තැබීය.

අපරාධ පරීක්ෂණ දෙපාර්තමේන්තුවේ විශේෂ විමර්ශන අංශයේ ස්ථානාධිපති ප්‍රධාන පොලිස් පරීක්ෂක රංජිත් මුණසිංහ මහතා සහ උප පොලිස් පරීක්ෂක උපාලි බණ්ඩාර මහතා පැමිණිල්ල මෙහෙයවීය.

සියනෑ පරිසරය සුරැකීමේ සංවිධානයේ ප්‍රධාන සංවිධායක සුරේෂ් පෙරේරා මහතා ඇතුළු ගම්වාසීහු පිරිසක්  අධිකරණයට පැමිණ සිටියහ.