(අංජුල මහික වීරරත්න)

වත්මන් ආණ්ඩුව ජනතාවට අගතියක් වන කිසිදු ආකාරයේ තීන්දුවක් නොගන්නා අතර ජනතාව වෙනුවෙන් ගන්නා කිසිදු තීන්දුවක් ආපසු හැරවීමට සූදානම් නොමැති බව ජනාධිපති අනුර කුමාර දිසානායක මහතා පැවසීය.

නව ව්‍යවස්ථා සංශෝධනය තුළින් අපේක්ෂා කරන්නේ පොදු ජනතාව තුළ නීතිය පිළිබඳ තිබෙන විශ්වාසය තහවුරු කිරීමත්, යුක්තිය පසිඳලීම කාර්යක්ෂම කිරීම බවත් ජනාධිපතිවරයා කීය.

ජනාධිපතිවරයා මේ බව සඳහන් කළේ මීගමුව අල් – හිලාල් මධ්‍ය මහා විද්‍යාලයීය ක්‍රීඩාංගණයේදී  අද  (26) පස්වරුවේ පැවති 42වෙනි ජාතික මීලාද්–උන් නබි රාජ්‍ය මහෝත්සවය අමතමිනි. 

මුහම්මද් නබිතුමා ඇතුළු සියලු ආගමික ශාස්තෘන්වහන්සේගේ මඟපෙන්වීම වූ සාමය, මෛත්‍රිය, මනුෂ්‍යත්වය කැටි කරගත් සමාජයක් බිහි කිරීම වෙනුවෙන් වත්මන් රජය කැපවී සිටින බවද ජනාධිපතිවරයා කීය.

 කවර ආකාරයේ ජාතිවාදී හෝ ආගම්වාදී ගැටුමකට යළි  රටේ ඉඩ නොතබන බව ද ජනාධිපතිවරයා  අවධාරණය කළේය. 

 රට දියුණු, යහපත් රාජ්‍යයක් ලෙස ගොඩනැගීමේදී අන් කවර බලයකට වඩා මහජන බලය කෙරෙහි දැඩි විශ්වාසයක් තබා තිබෙන බව ජනාධිපතිවරයා පැවැසීය.

රට ගොඩනැගීමේ වැදගත්ම පාදම වන ජාතික සමගිය වෙනුවෙන් රජය කැපවී කටයුතු කරන බවත්, ජාත්‍යන්තර ඉදිරියේ ගෞරවයට සහ පිළිගැනීමට පාත්‍ර වූ රාජ්‍යයක් ලෙස ශ්‍රී ලංකාව යළි ඔසවා තැබීමට මෙන්ම නබිනායකතුමාගේද ඉගැන්වීම වූ නීතිය ඉදිරියේ සැවොම සමානයි යන්නට පණ පෙවීමට ආණ්ඩුව ගතවූ කාලය තුළ කැපවී කටයුතු කළ බවත් පැවසීය.

බුද්ධශාසන, ආගමික හා සංස්කෘතික කටයුතු අමාත්‍යාංශය සහ මුස්ලිම් ආගමික හා සංස්කෘතික කටයුතු දෙපාර්‌තමේන්තුව එක්ව මෙම උත්සවය  සංවිධානය කර තිබූ අතර ගම්පහ දිස්ත්‍රික්කයේ මුස්ලිම් පල්ලිවල වසර ගණනාවක සිට ආගමික කටයුතු සිදු කරමින් තම ජීවිතයේ වැඩි කාලයක්  කැපකළ  මවුලවිවරුන් ඇතුළු පුජ්‍ය ප්‍රසාදීන් වහන්සේ සමාජයට සිදුකළ සේවාව ඇගයීමද ජනාධිපතිවරයා අතින් සිදු කෙරිණි.

එමෙන්ම  ජාතික මීලාද්-උන් නබි සැමරුමට සමගාමීව සංවිධානය කර තිබූ පාසල් තරගවල  ජයග්‍රාහී සිසු සිසුවියන්ට ත්‍යාග ප්‍රදානය කිරීමද ජනාධිපතිවරයා අතින් සිදු කෙරුණු අතර 2026 ජාතික මීලාද්-උන් නබි රාජ්‍ය මහෝත්සවය නිමිත්තෙන් නිකුත් කළ සමරු මුද්දරය සහ මුල්දින කවරය මෙන්ම ගම්පහ දිස්ත්‍රික්කයේ මුස්ලිම්වරුන්ගේ ඉතිහාසය පිළිබඳ ලියැවුණු ග්‍රන්ථයක් සහ  ජාතික මීලාද්-උන් නබි සැමරුම 2026 සමරු කලාපයද ජනාධිපතිවරයා වෙත පිළිගැන්විණි.