(සුජිත් හේවාජුලිගේ සහ  අංජුල මහික වීරරත්න)

රජයේ ආයතන 52ක්  2024 වසරේ ජනවාරි සිට ඔක්තෝබර්  දක්වා කාලයේදී රුපියල් කෝටි 42800ක ලාභයක් ලබා ඇතැයි මහජන මුදල් පිළිබඳ පාර්ලිමේන්තු කාරක සභාවේදී තොරතුරු අනාවරණය විය.

එසේම රජයේ ආයතන 2022 වසරේ ලබා ඇති සමස්ත පාඩුව  රුපියල් කෝටි 77400ක් බව එම කාරක සභාව සඳහන් කරයි.

පසුගිය වසරේ ජනවාරි මස සිට ඔක්තෝබර් දක්වා කාලයේදී ශ්‍රී ලංකන් ගුවන් සමාගම සැලකිය යුතු පාඩුවක් ලබා ඇතැයිද එහිදී තොරතුරු අනාවරණයවිය.

එසේම දඹුල්ල ප්‍රදේශයේ 2019 වසරේ ඉදිරි කිරීම ආරම්භ කළ තවමත් විවෘත කිරීමට නොහැකි වූ එළවළු සහ පළතුරු කල්තබාගත හැකි ශීතාගාර සහිත කෘෂිකාර්මික ගබඩාව (Agriculture warehouse) පිළිබඳවද කාරක සභාවේදී   අවධානයට  යොමුවිය

සියලු වැඩ නිමකර ඇතත් ශීතකරණ මිලදී ගැනීමේ ප්‍රමාදයක් නිසා මෙම ව්‍යාපෘතිය පමාවී ඇති බව නිලධාරීහු පැවසූහ. ඉන්දියාවෙන් ලැබුණු  ප්‍රදානයකින්  ඉදිකර ඇති මෙම ස්ථානය ගොවීන්ගේ ප්‍රයෝජනයට ලබා නොදීම විශාල අපරාධයක් බැවින් ඒ සඳහා කඩිනමින් කටයුතු කරන ලෙස  කාරක සභා සභාපති අාචාර්්‍ය හර්ෂද සිල්වා මහතා  මෙහිදී  ඉල්ලීමක් කළේය.

තවද කොළඹ ජාතික කලාභවන වසර 5ක් මුළුල්ලේ වසා තැබීම පිළිබඳවද මෙහිදී අවධානය යොමුවිය.  රුපියල් කෝටි දොළහක වියදමින්  මෙහි ප්‍රතිසංස්කරණ අාරම්භ කර ඇති බවත් ප්‍රසම්පාදන ක්‍රියාවලියේ ප්‍රමාදයක් නිසා විවෘත කිරීම පමාවී ඇති බවත් සදහන් විය.  එම කටයුතු කඩිනමින් අවසන් කර ජනතාවට  දෙන ලෙස  කාරක සභා සභාපතිවරයා උපදෙස් දුන්නේය. .

එසේම රාජ්‍ය ණය කළමනාකරණය පිළිබඳවද කාරක සභාවේදී අවධානය යොමුවිය. ණය කළමනාකරණය සඳහා වෙනම පනතක් සම්මත කර  ඇති පසුබිමක එහි විධිවිධාන ප්‍රායෝගිකව ක්‍රියාත්මක කිරීම සඳහා කටයුතු කිරීමේ අවශ්‍යතාවයද මෙහිදී අවධාරණය කෙරිණි. ඒ සඳහා විශේෂඥ හැකියාවෙන් පිරිපුන් නිලධාරීන්ගේ සේවය ලබා ගැනීමේ අවශ්‍යතාවය  කාරක සභා සභාපතිවරයා  පෙන්වා දුන්නේය.

මේ රැස්වීමට   නියෝජ්‍ය අමාත්‍ය ආචාර්ය හර්ෂණ සූරියප්පෙරුම, පාර්ලිමේන්තු මන්ත්‍රීවරැන්   වන, රවි කරුණානායක, ආචාර්ය  කෞෂල්‍යා ආරියරත්න, අර්කම් ඉල්ලියාස්, නිමල් පලිහේන, විජේසිරි බස්නායක, තිළිණ සමරකෝන්, නීතීඥ  ලක්මාලි හේමචන්ද්‍ර යන මහත්ම මහත්මීහුද  සහභාගි වූහ.