(සුජිත් හේවාජුලිගේ)

ජිනීවාහි පැවැත්වෙන ලෝක සෞඛ්‍ය සංවිධානයේ 70 වැනි මහ සමුළුවට සෞඛ්‍ය ප්‍රධානීන් 20 දෙනකුගෙන් යුත් කණ්ඩායමක් යැවීමට සෞඛ්‍ය ඇමැති රාජිත සේනාරත්න මහතා කළ නිර්දේශය ජනාධිපතිවරයා විසින් ප්‍රතික්ෂේප කර ඇතැයි වාර්තා වේ.

ඇමැතිවරයා යවා තිබූ විසිදෙනාගේ ලැයිස්තුව ජනාධිපතිවරයා විසින් 14 කට අඩුකර යවා තිබෙන බව ජනාධිපති කාර්යාල ආරංචි මාර්ගවලින් පැවසේ.

ජනාධිපතිවරයා මේ ලැයිස්තුවෙන් නම් හයක්ම ඉවත් කර ඇත්තේ තමා සෞඛ්‍ය ඇමැති ධුරය දැරූ කාලයේදීවත් මෙතරම් විශාල පිරිසක් ජිනීවා සමුළුවට එකවර ගෙන ගොස් නැතැයි පවසමින් යැයිද දැනගන්නට තිබේ.
ජිනීවා යෑම සඳහා ඇමැතිවරයා නම් කළ විසි දෙනාගේ ලැයිස්තුවට ඇතුළත් වී සිටියේ සෞඛ්‍ය පරිපාලනයට සම්බන්ධ නියෝජ්‍ය  අධ්‍යක්ෂකවරුන් පිරිසකි.

මේ සම්බන්ධයෙන් අප කළ විමසුමකදී අදහස් දැක්වූ සෞඛ්‍ය නියෝජ්‍ය අමාත්‍ය ෆයිසාල් කාසිම් මහතා පැවැසුවේ මේ සිද්ධිය සත්‍යයක් බවය.

විස්සේ ලැයිස්තුව ජනාධිපතිවරයා විසින් දාහතරට අඩු කර එවා ඇතැයි ද ඔහු කීය.

ලෝක සෞඛ්‍ය සංවිධානයේ ජිනීවා සමුළුව අදින් (21) ඇරැඹෙන අතර එය ලබන 30 වැනිදා දක්වා පැවැත්වීමට නියමිතය. මේ සමුළුවට සහභාගිවීමට සෞඛ්‍ය පෝෂණ හා දේශීය වෛද්‍ය ඇමති රාජිත සේනාරත්න මහතා ද පෙරේදා (19) රාත්‍රී දිවයිනෙන් පිටත්ව ගියේය.