ගීතමය රූපරචනාවලින් ක්ෂේත්‍රයට ප්‍රවිෂ්ටවූ ඔහු චාමර සමරවික්‍රම වේ. ඔහුගේ ඉදිරි රංගන කටයුතු පිළිබඳව කතාබහ කිරීමට අපත් සමග මෙලෙසින් එක්විය.

​ඔබ ගැන හැඳින්වීමක් කළොත්?

නම චාමර සමරවික්‍රම. ගම කුරුණෑගල. අම්මා තාත්තා සහ මල්ලි සමග ජීවත්වෙන්නෙ

​දැන් වෘත්තීමය මට්ටමෙන් මොකද කරන්නේ?

පවුලේ ව්‍යාපාර කටයුතුවලට සම්බන්ධවෙලා ඉන්නවා.

කලාවට එකතු වෙන්නේ කොහොමද?

මුලින්ම කලාවට යොමු වුණේ පාසල් වේදිකාවෙන්. ඊට පසුව තිස්ස විජේකෝන් අධ්‍යක්ෂවරයා මුණගැසීමත් සමග පුංචි තිරයට රංගන දායකත්වය ලබාදීමට අවස්ථාව උදාවුණා.

මෑතකදී දායක වුණු කටයුතු මොනවාද?

විදේශ ගත වී වසර පහකට විතර පස්සේ නැවතත් ලංකාවට පැමිණීමත් සමග, මෑත කාලයේ යොවුන් පරපුරේ ගායකයෙකු වන නිලූ කාරියසිංහගේ 'තව කඳුළු නෑ' ගීතයටද, කොටස් කිහිපයකින් යුතු ටෙලිනාට්‍යකටද රංගන දායකත්වය ලබා දීමට හැකිවුණා. 'රටවිරු ස්ටාර්' තරගයට සහභාගී වුණා. දිනේෂ් විජේසිංහගේ මුල්ම ගීත රූපරචනාවටද සහභාගී වීමට අවස්ථාව ලැබුණා.

කලාව පිළිබඳව යම් හැදෑරීමක් කරලද තියෙන්නේ?

තිස්ස විජේකෝන් මහත්මයා යටතේ පුහුණු වැඩමුළුවලට සහභාගී වුණා. බර්ටි සුසිරිපාල, රිචඩ් වීරක්කොඩි, සරත් දික්කුඹුර වැනි ප්‍රවීණයන්ගේ ඇසුර ලබමින් රංගන කටයුතුවලට රටින් බැහැර වීමට පෙර කටයුතු කළා. ඒ හේතුවෙන් මගේ ජීවිතයේ රංගන කටයුතු සඳහා ලොකු පිටුවහලක් ලබාගැනීමට අවස්ථාව ලැබුණා.

ඉදිරි කටයුතු ගැන කිව්වොත්?

ඉදිරියේදී ගීත රූපරචනා දෙකකට සහ ටෙලිනාට්‍යයක් සඳහා ඇරයුම් ලැබිලා තියෙනවා. ඒ වැඩකටයුතුත් සමග කාලය ගත කරනවා.

කවුරු හරි මතක් කරන්න පිරිසක් ඉන්නවාද?

ඔව්, අනිවාර්යයෙන්ම. අම්මා, තාත්තා, සහෝදරයා ඇතුළු මට වචනයකින් පවා උදවු කළ සියලුම දෙනාටත් මගේ මිතුරු කැලත් මේ වෙලාවේ මතක් කරනවා.

ඩිලාන් ක්‍රිෂාන්ත