යුක්රේනය නේටෝ සංවිධානයේ සාමාජිකත්වය ලබා ගැනීමට උත්සාහ කළහොත් නිශේධ බලය භාවිත කරමින් එම උත්සාහය අවහිර කිරීමට කටයුතු කරන බව ස්ලොවේකියානු අග්‍රාමාත්‍ය රොබර්ට් ෆිකෝ ප්‍රකාශ කළේය.

යුක්රේනයට නේටෝ සංවිධානයේ සාමාජිකත්වය ලබා ගැනීමට අවස්ථාව දීම තුන්වැනි ලෝක යුද්ධය ආරම්භ කිරීමට අත වැනීමක් බවද අග්‍රාමාත්‍යවරයා පැවැසුවේය.

යුක්රේනය නේටෝ සංවිධානයේ සාමාජිකයකු වුවහොත් නේටෝ සංවිධානයට රුසියාව සමඟ යුද වැටීමට සිදුවන බවද අග්‍රාමාත්‍ය ෆිකෝ ප්‍රකාශ කළේය.එසේම නේටෝ සංවිධානය යුක්රේනයට අවි සැපයීම නතර කළ යුතුය යන ස්ථාවරයේ සිටින බවද අග්‍රාමාත්‍යවරයා පැවැසුවේය.

යුක්රේන සංචාරයට පෙර පෙරේදා(20) අග්‍රාමාත්‍යවරයා මෙම අදහස් ප්‍රකාශ කර ඇත.තමන් යුක්රේනයේ සංචාරය කරන්නේ මානුෂීය ගැටලු පිළිබඳ සාකච්ඡා කිරීමට බවද අග්‍රාමාත්‍ය ෆිකෝ සඳහන් කළේය.යුක්රේනය යුරෝපා සංගමයේ සාමාජිකත්වය ලබා ගැනීම සම්බන්ධව විරුද්ධතාවයක් නැතත් ඒ සඳහා මූලික අවශ්‍යතාවයන් යුක්රේනය සපුරා ලිය යුතු බවද ඔහු පැවැසුවේය.සාමාජිකත්වය ලබා ගැනීමේ මූලික අවශ්‍යතාවයන් සපුරා නොමැති රටක් යුරෝපා සංගමයේ සාමාජිකත්වය ලබා ගැනීම පිළිගත නොහැකි බවද අග්‍රාමාත්‍යවරයා ප්‍රකාශ කළේය.

(විමුක්ති එස් රුද්‍රිගු)