(විමුක්ති එස් රුද්‍රිගු)

ශ්‍රී ලංකා මහ බැංකුව වාහන ආනයනය සීමා කිරීමට කිසිඳු තීරණයක් ගෙන නැති බවත් තමන් දන්නා තරමින් රජයටද වාහන ආනයනය සීමා කිරීමට කිසිම බලාපොරොත්තුවක් නොමැති බවත් මහ බැංකු අධිපති ආචාර්ය නන්දලාල් වීරසිංහ මහතා අද (23) ප්‍රකාශ කළේය.

පසුගිය පෙබරවාරි 1 වැනිදා මෙරට වාහන ආනයන සීමා ඉවත්කර ආකාරයටම ඉදිරියටත් මෙරට වාහන ආනයනය විවෘතව පවතිනු ඇතැයි ආචාර්ය නන්දලාල් වීරසිංහ මහතා පැවැසුවේය. වාහන මිලදී ගැනීම සඳහා ලබාදෙන උපරිම ණය සීමාව සංශෝධනය කිරීමෙන් වාහන ආනයනය සීමා කිරීමට බලාපොරොත්තු නොවන බවද ඔහු ප්‍රකාශ කළේය.

වාහන මිලදී ගැනීම සඳහා ණය පහසුකම් ලබාදීමේදී බලපත්‍රලාභී වාණිජ බැංකු, විශේෂිත බැංකු, මූල්‍ය සමාගම් සහ ලියාපදිංචි මුල්‍ය කල්බදු ආයතන අනුගමනය කළ යුතු ක්‍රමවේද යාවත්කාලීන කරනු ලැබුවේ මූල්‍ය පද්ධතියේ සමස්ත ස්ථාවරත්වය පවත්වාගෙන යාමේ ප්‍රතිපත්තිමය හා නියාමන ක්‍රියාමාර්ගයක් ලෙස බවද මහ බැංකු අධිපතිවරයා ප්‍රකාශ කළේය.

බැංකුවකින් හෝ මූල්‍ය ආයතනයකින් ඕනෑම ණය මුදලක් ලබා ගැනීමට යාමේදී ලබාගත හැකි උපරිම ණය සීමාවක් තිබෙන බවත් එලෙස උපරිම ණය සීමාවක් තිබෙන්නේ රටේ මූල්‍ය පද්ධතිය ආරක්ෂා කර ගැනීමට බවත් ආචාර්ය නන්දලාල් වීරසිංහ මහතා පැවැසුවේය. එමගින් යම් පුද්ගලයකු ණය මුදලක් ගැනීමේදී ඔහු ලබා ගන්නා ණය මුදල දරාගත හැකි මට්ටමක තිබෙන බව සහතික කරන බවද ඔහු ප්‍රකාශ කළේය.

මෝටර් රථ ආනයනය කිරීම සඳහා වසර කීපයක තහනමක් තිබූ බැවින් උපරිම ණය සීමාව සංශෝධනය නොකළ බවත් නමුත් නව මහ බැංකු පනත යටතේ මූල්‍ය පද්ධතියේ සමස්ත ස්ථාවරත්වය පවත්වාගෙන යාමේ ප්‍රතිපත්තිමය හා නියාමන ක්‍රියාමාර්ගයක් ලෙස මෝටර් රථ මිලදීගැනීමේදී ලබාදෙන උපරිම සීමාව සංශෝධනය කළ බවත් මහ බැංකු අධිපතිවරයා පැවැසුවේය.

පුද්ගලික වාහනයක් මිලදී ගැනීමේදී සියයට 70 ක ණය මුදලක් ලබාගෙන ඉතිරිය සඳහා මුදල් යෙදවීම අසාධාරණ නොවන බවද ආචාර්ය නන්දලාල් වීරසිංහ මහතා ප්‍රකාශ කළේය. වාණිජ වාහනයක් මිලදී ගැනීමේදී උපරිම ණය සීමාව ඉහළ මට්මක තිබෙන්නේ එම වාහනවලින් ආදායමක් ලැබීමත්, මිලදී ගන්නන් වෙත මුදල් ගලා එම ඉහළ වීමත් නිසාවෙන් බවද වීරසිංහ මහතා පැවැසුවේය.

එක්දින ප්‍රතිපත්ති පොලී අනුපාතය පිළිබඳව මාධ්‍යවේදීන් දැනුවත් කිරීම සඳහා ශ්‍රී ලංකා මහ බැංකුවේදී අද (23) පැවැති මාධ්‍ය හමුවකදී මහ බැංකු අධිපති ආචාර්ය නන්දලාල් වීරසිංහ මහතා මෙම අදහස් පළ කළේය.