(සුජිත් හේවාජුලිගේ සහ අංජුල මහික වීරරත්ක)

ගුරු අධ්‍යාපනඥ සේවයේ  සහ අධ්‍යාපන පරිපාලන සේවයේ ස්ථානගත කිරීම් සහ මාරුවීම් සඳහා වඩාත් යහපත් ක්‍රමවේදයක් සකස් කරන බව අගමැතිනි ආචාර්ය හරිනි අමරසූරිය මෙනවිය  අමාත්‍යාංශයීය උපදේශක කාරක සභාවේදී පැවසුවාය

කාරක සභාවට  පැමිණ  මන්ත්‍රීවරුන් පෙන්වා දුන්නේ ගුරු අධ්‍යාපනඥ සේවයේ සහ අධ්‍යාපන පරිපාලන සේවයේ ස්ථානගත කිරීම් සහ මාරුවීම් සම්බන්ධයෙන් ගැටලු සහගත තත්වයක්  පවතින බවයි.

විශේෂයෙන්ම උතුරු මැද පළාත සඳහා පසුගියදා පත්  කළ නිලධාරීන් 6 දෙනෙකු  අතරින් 5 දෙනෙකු  නැවත ස්ථාන මාරුවීම් ලබාගෙන ඇති බවද ඔවුහු ප්‍රකාශ කළහ.

ඒ අනුව මේ සම්බන්ධයෙන් දීර්ඝව කාරක සභාවේ අවධානය යොමුවිය.  අදාළ පත්වීම් ලබාදීමේදී නිලධාරීන් සම්බන්ධ මානුෂීය කරුණු පිළිබඳවද සලකා බැලිය යුතු බව මෙහිදී සාකච්ඡා විය.

එසේම සේවා අවශ්‍යතාවය පිළිබඳවද නිලධාරීන් ස්ථානගත කිරීමේදී සැලකිලිමත් විය  යුතු බව මෙහිදි අග්‍රාමාත්‍යවරිය පෙන්වා දුන්නාය.

එසේම ගුරු අධ්‍යාපනඥ සේවයේ සහ අධ්‍යාපන පරිපාලන සේවයේ ස්ථානගත කිරීම් සහ මාරුවීම් සම්බන්ධයෙන් මේ දක්වා විධිමත් සැලැස්මක් හෝ ක්‍රමවේදයක් ක්‍රියාත්මක වී නොමැති බවත් මේ වන විට ඒ සම්බන්ධයෙන් පිළියම් සකස්කරමින් සිටින බවත්  අැය  පැවසුවාය.

මීට අමතරව ආබාධිත සිසුන් විශ්වවිද්‍යාලවලට ඇතුළත් කිරීම සම්බන්ධයෙන් අවශ්‍ය පියවර හැකි ඉක්මනින් ගන්නා ලෙසද අග්‍රාමාත්‍යවරිය නිලධාරීන්ට උපදෙස්  දුන්නාය. එසේම මෙම අමාත්‍යාංශයීය උපදේශක කාරක සභාව විසින් පත් කරන ලද අනු කාරක සභා හයෙහි ප්‍රගතිය සම්බන්ධයෙන්ද අදාළ අනු කාරක සභාවල සභාපතිවරු  කරුණු ඉදිරිපත්කළහ .

මෙම අමාත්‍යාංශයීය උපදේශක කාරක සභාව සභාවට  පාර්ලිමේන්තු මන්ත්‍රීවරුන් ඇතුළු නිලධාරීන් පිරිසක් සම්බන්ධ වූහ.