(විමුක්ති එස් රුද්‍රිගු)

ශ්‍රී ලංකාවේ දළ දේශීය නිෂ්පාදිතය සියයට 11.8 කින් පසුබා ඇතැයි ජන හා සංඛ්‍යා ලේඛන දෙපාර්තමේන්තුවේ දත්ත වාර්තා පෙන්වා දෙයි.

2022 වර්ෂයේ තෙවන කාර්තුවේදී කෘෂිකාර්මික, කාර්මික සහ සේවා කටයුතු පිළිවෙලින් සියයට 8.7ක්, සියයට 21.2ක් සහ සියයට 2.6 කින් පහත වැටී ඇතැයි එම දත්ත වාර්තාවේ දැක්වේ.

ඒ අනුව 2022 වසරේ තෙවන කාර්තුවේ පවත්නා මිල ගණන් යටතේ දළ දේශීය නිෂ්පාදිතය රුපියල් මිලියන 6,417,031ක් බව එම වාර්තාව පෙන්වා දෙයි.

එසේම ස්ථාවර මිල (2015) ගණන් යටතේ තෙවන කාර්තුවේ දළ දේශීය නිෂ්පාදිතය රුපියල් මිලියන 2,884,218 ක් බව එම වාර්තාවේ සඳහන් වේ.

තෙවන කාර්තුව ජුලි 1 සිට සැප්තැම්බර් 30 දක්වා අයිතිවන අතර පවත්නා මිල ගණන් සහ ස්ථාවර මිල (2015) ගණන් යටතේ දළ දේශීය නිෂ්පාදිතය සහ අනෙකුත් සාර්ව ආර්ථික දර්ශක එහිදී ඇස්තමේන්තු කර ඇත.

2021 වසරේ තෙවන කාර්තුවේ ස්ථාවර මිල (2015) ගණන් යටතේ දළ දේශීය නිෂ්පාදිතය රුපියල් මිලියන 3,629,510 ක් ලෙස වාර්තා වූ අතර එය 2022 වසරේ තෙවන කාර්තුවේදී රුපියල් මිලියන 2,884,218 ක් දක්වා පහත වැටී තිබේ.