(විමුක්ති එස් රුද්‍රිගු)

මානව හිමිකම් උල්ලංඝනය කිරීමේ සිදුවීම්වලට දඩුවම්දීමේ ක්‍රමයක් නොමැති වීම ,ආර්ථිකයට සිදුකළ අපරාධ සහ වංචා දුෂණය ශ්‍රී ලංකාව කඩා වැටීමට මුල් වූ කරුණු බව එක්සත් ජාතීන්ගේ මානව හිමිකම් මහ කොමසාරිස් මිෂෙල් බැචලේ මහත්මිය ප්‍රකාශ කළාය.

ශ්‍රී ලංකාවේ ඇති වී තිබෙන ආර්ථික අර්බුදය හේතුවෙන් ශ්‍රී ලාංකිකයන්ගේ ජීවිතවලට විශාල බලපෑමක් එල්ල වී ඇතැයි බැචලේ මහත්මිය පෙන්වා දුන්නාය. ශ්‍රී ලංකාවේ අර්බුදකාරී තත්ත්වය නිරීක්ෂණය කරමින් එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලය ශ්‍රී ලංකාවේ අතීත මානව හිමිකම් කඩවීම් සමඟ ආර්ථික ප්‍රශ්න පැහැදිලිව සම්බන්ධ කළ පළමු අවස්ථාව මෙය බව විචාරකයෝ පවසති.

ශ්‍රී ලංකාවේ සිවිල් යුද්ධය අවසන් වී වසර 13 ක් ගත වී ඇතත් අතීතයේ සිදු වූ මානව හිමිකම් උල්ලංඝනය කිරීමේ සිදුවීම්වල වින්දිතයන් තවමත් යුක්තිය ලැබෙන තෙක්  සහ සත්‍ය හෙළි වන තෙක් බලා සිටින බව මානව හිමිකම් පිළිබඳ මහ කොමසාරිස් කාර්යාල ප්‍රකාශ කළේය.  

මානව හිමිකම් කවුන්සිලයේ 51වෙනි සැසිවාරය එළඹෙන 12 වෙනිදා ආරම්භ වීමට නියමිත අතර එකසත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලය ඊයේ (06) ශ්‍රී ලංකාව පිළිබඳ මානව හිමිකම් වාර්තාව නිකුත් කළේය. ශ්‍රී ලංකාව දරුණු ආර්ථික අර්බුදයකට මුහුණ දී සිටින බවත්, ශ්‍රී ලංකාව යථා තත්ත්වයට පත් කිරීම සඳහා ජාත්‍යන්තර ප්‍රජාවේ සහාය ශ්‍රී ලංකාවට ලබා දෙන ලෙසත් එම වාර්තාව මගින් මානව හිමිකම් පිළිබඳ මහ කොමසාරිස් කාර්යාලය ජාත්‍යන්තර ප්‍රජාවගෙන් ඉල්ලා සිටියේය.

කෙසේ වෙතත් මානව හිමිකම් උල්ලංඝනය කිරීමේ සිදුවීම් වලට ඇති "දණ්ඩමුක්තිය",ආර්ථිකයට සිදුකළ අපරාධ සහ දුෂණය ඇතුළුව ශ්‍රී ලංකාවේ කඩා වැටීමට හේතු වූ කරුණු හඳුනා ගනිමින් ඒවාට පිළියම් යෙදීමට ශ්‍රී ලංකාවට සහාය විය යුතු බව මානව හිමිකම් පිළිබඳ මහ කොමසාරිස් කාර්යාලයේ ඉහළ නිලධාරියෙක් ප්‍රකාශ කළේය.

ශ්‍රී ලංකාවේ සියලු ප්‍රජාවන් වගවීම සහ ප්‍රජාතන්ත්‍රවාදී ප්‍රතිසංස්කරණ සඳහා කරන ලද ඉල්ලීම ශ්‍රී ලංකාවේ නව සහ පොදු දැක්මක වැදගත් ආරම්භක ලක්ෂ්‍යයක් බව මානව හිමිකම් වාර්තාවේ සඳහන් වේ.