බැලූම්මහර හංදියේ සිට රතුපස්වල ක‍්‍රීඩාංගනය දක්වා හෙට මා පා ගමනින් ගමට වඩිනවා. සියලූ ගම්වැසියන් ගල් කැටයක් රැගෙන එන්න. මාගේ හිසට පහර දෙන්න යැයි රතුපස්වල ජල ගැටළුවත් සමග මහත් ආන්දෝලනයකට ලක්ව සිටින තෙරිපැහැ සිරිධම්ම හිමියෝ අද ගම්පොළදී මාධ්‍ය හමුවකදී පැවැසූහ.

ගම්පොළ සිංහාපිටිය ධර්මාශ‍්‍රම විහාරස්ථානයේදී මාධ්‍ය හමුව පැවැත්විණි.

මා හට නගා ඇති චෝදනා ඔබ අනුමත කරනවා නම් මා හට ගල්වලින් පහරදී රතුපස්වල ක‍්‍රීඩාංගනයට රැගෙන ගොස් කීතු කීතුවලට මා කපා දමන්න. එක එක අයගේ වෙඩි උණ්ඩවලට වඩා එය මට අභිමානයක්.

සිරිධම්ම හාමුදුරුවෝ කඩප්පුලි වැඩ කරලා නැහැ. ඒවා කරන්නේ දේශපාලනඥයෝ. ඔබ වෙනුවෙන් සිදුකරන ජීවිත පරිත්‍යාගයට එදා වගේම අදත් අද වගේම හෙටත් කිරීමට සූදානම්.

”හිතන්න එපා සිරිධම්ම හාමුදුරුවෝ මේ ප‍්‍රශ්නයෙන් පැනලා ගියා කියලා.”

යම් කිසි කෙනෙක් කියනවා නම් සිරිධම්ම හාමුදුරුවෝ කප්පම් අරගෙන ඉන්නවා කියලා එය සම්පූර්ණ සාවද්‍යයක්. ඒවා තමයි සැබෑ මුසාවාද කියන්නේ.

රතුපස්වල ගැටලූව ඇතැම් මාධ්‍ය මගින් විකෘති කොට ප‍්‍රකාශ කර තිබෙනවා. ඒ අනුව ඉදිරි මාස හයේ ගලවාගෙන යනවා යැයි කී කර්මාන්ත ශාලාව තවත් චිරාත් කාලයකට නොගැලවෙනු ඇත. ඊට එරෙහිව නැගූ ජනතා හඬද දැන් කොටස් වලට කැඞී නිහඬ වී ඇති බැවින් කර්මාන්ත ශාලාවේ ඉදිරි කටයුතු රිසිසේ කරගෙන යාමට හැකිවනු ඇත. මහජනයා වෙනුවෙන් ගතහැකි සෑම තීන්දුවක් තීරණයක්ම ගන්න මේ සිරිධම්ම හාමුදුරුවෝ ඉන්නවා.

මේ රජය රතුපස්වල ගැටළුවට පැහැදිලිව උත්තර දිය යුතුයි. සියනෑ කෝරලය කියන්නේ මේ ආණ්ඩුවේ හදවතයි. හැබැයි මේ මිනිස්සුන්ට බොන්න වතුර ටික නැහැ. මිනිසුන්ගේ මේ බේද බින්න වීමට ආණ්ඩුව වගකිව යුතුයි. ආණ්ඩුව රතුපස්වල ජනතාවත් එක්ක සෙල්ලම් කරන්න හිතන්න එපා.

තෙරිපැහැ සිරිධම්ම හාමුදුරුවොත් ඒකක මිනිස්සු තරහයි කියලා හිතන්න එපා. එදාටත් වඩා අද මහජනතාව මගෙත් එක්ක ඉන්නවා.

සල්ලිත් අරං මම රට ගිහින් කියලා ප‍්‍රචාරයක් තිබුණා. ඔව් මං රට ගියා. ඒ තමයි උඩරට. උඩරට ඉඳලා රතුපස්වලට මම එන බව ඒ කවුරුත් දැන ගත්තොත් හොඳයි.

මේ ගැටලූවේදී ප‍්‍රධාන ප‍්‍රශ්න දෙකක් තියෙනවා. ඒ තමයි බවුසර් මගින් ජලය දිමේදී ඒවා හරියට කෙරෙන්නේ නැහැ. ඒ වගේම අතුරුපාරවල්වල ජලනල එලීම වගේම මිනිස්සුන්ට ජලය දීම පිළිබඳ හරි තීන්දුවක් නැහැ.

සමහර අය කියනවා ඔබ වහන්සේ එදා කියූ දේ නොවෙයි අද කතා කරන්නේ කියලා. වගකිවයුතු අයත් එක්ක කතා කරන කොට අපි මස් රාත්තලම ඉල්ලන්න හොඳ නැහැ. හැබැයි සියයට වැඩි ප‍්‍රතිශතයක මේ ප‍්‍රශ්නය නිරාකරණය විය යුතුයි. නමුත් අදටත් රතුපස්වල ජනතාවගේ ජන ජීවිතය මේ අය කඩාකප්පල් කරලා තියෙනවා. ඔවුන් බිය ගන්වලා තියෙනවා. ඔවුන් පීඩාවට පත් කරලා තියෙනවා. මේවායින් අපට පේන්නේ මේක විසඳෙන පාටක් නොවේ.

පළාතේ ඉන්න ඇතැම් දේශපාලනඥයෝ වලිගෙ කකුල් දෙක අස්සේ ගහගෙන ඔක්කොම හොරට බුදි. මුන්ට  ඕනෑ මඩිය තද කරගන්ඩයි. ඡන්දෙ ගන්ඩයි විතරයි.

ජනාධිපතිවරයා මේ පිළිබඳ කිසිම ප‍්‍රකාශයක් කරන්නේ නෑ. ඒ වගේම අර පරීක්ෂණ වාර්තාව ලේකම්වරයා කිහිල්ලේ ගහගෙන ඉඳලා බාරදුන්නා කියලා ආරංචියි. දැන් මාස ගාණක් ගතඋනත් මේ ගැටලූව පිළිබඳව කිසිම නිගමනයක් නෑ.

අපි කියන්නේ වහාම පොදු රාජ්‍ය මණ්ඩල සමුළුවට පෙර මේ සඳහා හරි විසඳුම් දෙන්න  ඕන කියලයි. ඒ සඳහා තමයි අද මම රතුපස්වලට එන්නේ.

මුළු ලෝකයටම ගිය මේ ප‍්‍රශ්නය මේ වනතුරු අපේ අයට දැනිලාවත් නෑ. ඒ නිසා මහජනතාවට පරාජය අත්කරලා දෙන්න බෑ. ඒ අය ජයග‍්‍රහණය කළ යුතුයි. ඒ නිසයි මම නැවතත් රතුපස්වලට එන්නේ.

ප‍්‍රශ්නය:පොදු රාජ්‍ය මණ්ඩල සැසියට පෙර මේ ගැටලූව විසඳුනේ නැත්නම් ඔබවහන්සේ මොනවද කරන්නේ.

උත්තරය:ඒ තීරණය තීන්දුව හා නිගමනය මම මහජනතාවත් එක්ක ගන්නවා. එවිට එය කුමන තීරණයක්ද යන්න කාටත් වැටහේවි.

ප‍්‍රශ්නය:මහජනතාව වෙතින් ඔබ වහන්සේට විරෝධතා එල්ල වී තිබියදී බැලූම්මහර සිට රතුපස්වලට පා ගමනින් වඩිද්දී යම් අර්බුදකාරී තත්ත්වයක් ඇතිවෙයි කියලා හිතන්නේ නැද්ද?

උත්තරය: මම ආරධනා කරනවා මම වැරදි කරලා තියෙනවා නම් වැලිවේරිය, ඇටිකෙහෙල්ගල්ල, ඉඹුල, හේනේගම, කහටාන, හිරිපිටිය, කිනිගම, බුත්පිටිය, පිටුවල්ගොඩ, ගොඩගෙදර, කතුරුවත්ත, බැලූම්මහර, ගල්ඔලූව, නැදුන්ගමුව, රතුපස්වල, හීන්පන්විල, ඌරුවල, කුඩුමිරිස්ලන්ද කියන මේ සෑම ගම් ප‍්‍රදේශයක්ම ආවරණය වන පරිදි පුංචි ගල් කැටයක් හරි අරගෙන එන්න කියලා මේ සිරිධම්ම හාමුදුරුවන්ගේ ඔලූවට ගහන්න කියලා. මම ජනතාවට කියන්න කැමතියි සිරිධම්ම හාමුදුරුවො කඩප්පුලි වැඩ කරලා නැහැ කියලා.