අතීතයේ සිදුවුණු රසමුසු අත්දැකීම් ඉඳහිට හෝ යළිත් අප සිහිපත් කරන්නේ, ඒ තුළින් අපටත් යම්කිසි පාඩමක් උගත හැකි නිසායි.

මේක සිද්ධවෙලා තියෙන්නෙ මීට අවරැදු ගාණකට කලින් ගුවන් විදුලියේ ජනප්‍රිය නිවේදකයකු වූ ධර්ම ශ්‍රී වික්‍රමසිංහට.

එදා ගුවන් විදුලියේ ප්‍රවෘත්ති නිවේදකයා ලෙස කටයුතු කළේ ඔහු. ඒ දවස්වල ලෝක ප්‍රවෘත්ති ප්‍රචාරය කළේ වෙනම රාත්‍රී 7.30ට. ඔන්න එදා රූ ගුවන් විදුලි සංස්ථාවෙ සභාපතිගෙ ගෙදර උත්සවයක්. ලොක්කාගෙ ගෙදරට දැන් ගුවන් විදුලියෙ හැමෝම ලෑස්තිවෙලා යනවලු. ධර්ම ශ්‍රීට යන්න විදියක් නෑ ලෝක ප්‍රවෘත්ති සජීවීව ප්‍රචාරය නොකර. ඔහොම ඔහු තැවි තැවී ඉන්නකොට කාර්මික අංශයේ නිලධාරියෙක් ධර්ම ශ්‍රීට කිව්වලු, "ඔන්න ඕක රෙකොඩ් කරලා දාමු. අදට විතරනෙ. ඔයාට ලොක්කගෙ ගෙදර පාටියට යන්නත් පුළුවන් කියලා."

ඔන්න ධර්ම ශ්‍රීත් ප්‍රවෘත්ති රෙකෝඩ් කරලා පාටියට ගියාලු.

ලොක්කගෙ ගෙදර ගුවන් විදුලි යන්ත්‍රය මහ හඬින් දාලා තිබෙනවා. ධර්ම ශ්‍රී ලොක්කා එක්ක සුහද කතාබහක යෙදිලා ඉන්න කොට එක පාරටම රේඩියෝ එකේ යනවලු, "මෙන්න ලෝක ප්‍රවෘත්ති ප්‍රකාශය ධර්ම ශ්‍රී වික්‍රමසිංහ" කියලා.

සභාපති තේවිස් ගුරැගේ මහතා ධර්ම ශ්‍රී දිහා එක පාරයිලු බැලුවෙ. පහුවදා උදේම කාර්යාලයට යද්දි ධර්ම ශ්‍රීගෙ මේසෙ උඩ දඩ කොළයක්ලු. ගුවන් විදුලි සංස්ථාවේ නීති උල්ලංඝනය කළාට රැපියල් 50ක දඩයක්.

එදා ආයතනවල අද වගේ මුහුණු බලලා නීති රීති වෙනස් කරපු කාලයක් නෙවෙයි. කවුරැ වරදක් කළත් වැරුද්ද වැරුද්දමයි.