(සුජිත් හේවාජුලිගේ සහ  අංජුල මහික වීරරත්න)

රටේ විවිධ පුද්ගලයන් මාදුරුඔය දකුණු ඉවුර ව්‍යාපෘතියට  අයත් මහවැලි ඉඩම් අක්කර දහස් ගණනක්  2020 සහ 2021 වර්ෂවලදී නීති විරෝධීව  අල්ලා ගැනීමෙන්  බරපතළ ඉඩම් දූෂණයක් සිදු වූ බව  හිටපු ජනාධිපති පොළොන්නරු දිස්ත්‍රික් මන්ත්‍රී මෛත්‍රිපාල සිරිසේන මහතා පාර්ලිමේන්තුවේදී අද‍ (6)  පැවසීය.

මෙම ඉඩම් අල්ලා ගත් පුද්ගලයන්  කවුරුන්දැයි කිසිවකු හෝ නොදන්නා බව පැවසූ හිටපු ජනාධිපතිවරයා ගොවි ජනතාවට දිය යුතු ඉඩම් මෙනිසා  ඔවුනට අහිමිවූ  බවද ප්‍රකාශ කළේය.

මෛත්‍රිපාල සිරිසේන මහතා මෙසේ පැවසුවේ සංචාරක සහ ඉඩම්, බුද්ධ ශාසන සහ සංස්කෘතික අමාත්‍යාංශයන්හි වැය ශීර්ෂ පිළිබඳ අයවැය කාරක සභා අවස්ථාවේ විවාදයේදීය.

හිටපු ජනාධිපතිවරයා මෙසේද පැවසීය.

මාදුරුඔය දකුණු ඉවුර ව්‍යාපෘතිය ක්‍රියාත්මක කිරීමට වසර තිහක් තිස්සේ සෑම රජයක්ම උත්සාහ දැරුවද ඊට මුදල් සොයා සොයා ගැනීමට නොහැකිවූ  බවද  ඔහු සඳහන් කළේය.

මහවැලි ඉඩම් ලබා දීමේදී ප්‍රමුඛත්වය ලබාදිය යුත්තේ ගොවීන්ට බවද හිටපු ජනාධිපතිවරයා කීවේය.