(සුජිත් හේවාජුලිගේ)

මැති ඇමැතිවරුන්ගේ වැටුප් වැඩි කිරීම සඳහා මුදල් ප්‍රතිපාදන සලසා දෙන්නැයි මුදල් අමාත්‍යංශය ලබන සතියේදී ඉල්ලීමක් කිරීමට පාර්ලිමේන්තුව තීරණය කර ඇත.

ඊට අවශ්‍ය මූලික කටයුතු මේ දිනවල කරගෙන යන බව පාර්ලිමේන්තුවේ උසස් නිලධාරියෙක් ලංකාදීපයට පැවැසීය.

මැති ඇමැතිවරුන්ගේ වැටුප් අධිකරණවල විනිසුරුවරුන්ගේ වැටුපට සමානුපාතිකව සියයට 215 කින් වැඩි කිරීමට තීරණය ගෙන ඇත්තේ ඉකුත් ජුලි මස 17 වැනිදා රැස්වුණු පාර්ලිමේන්තු පක්ෂ නායක රැස්වීමේදීය.

මේ තීරණය අනුව මැති ඇමැතිවරුන්ට  හිඟ වැටුප් ද සමඟ මේ මාසයේ වැටුප් ගෙවීමට රුපියල් කෝටි 12 කට වැඩි මුදලක් වැඩි වෙතැයි ගණන් බලා ඇත.

ජනවාරියේ සිට මේ දක්වා හිඟ වැටුප් ද සහිතව වැටුප් වැඩි කිරීමේදී මන්ත්‍රීවරයකුට අමතරව රුපියල් ලක්ෂ පහක්ද නියෝජ්‍ය ඇමැතිවරයකුට රුපියල් පන්ලක්ෂ පනස් දහසක්ද ඇමැතිවරයෙකුට රුපියල් ලක්ෂ හයක්ද හිමිවන බව පාර්ලිමේන්තු ආරංචි මාර්ග සඳහන් කරයි.

වැඩි කෙරුණු වැටුප් පාර්ලිමේන්තු මන්ත්‍රීවරුන් 136 දෙනාට පාර්ලිමේන්තුවේ ගිණුම් අංශයෙන් ගෙවනු ලැබේ. ඇමැතිවරුන් 41 දෙනාත් රාජ්‍ය ඇමැතිවරු 23 දෙනාත් නියෝජ්‍ය ඇමැතිවරු 22 දෙනාත් සඳහා වැටුප් වැඩි කිරීමට කතානායකවරයා අදාල අමාත්‍යංශ ලේකම්වරුන්ට දැනුම් දෙනු ඇතැයි පාර්ලිමේන්තු නිලධාරීහු කියති.

මැති ඇමැතිවරුන්ගේ වැටුප් වැඩි කිරීමට සම්ප්‍රධායිකව විශ්‍රාමික පාර්ලිමේන්තු මන්ත්‍රීවරුන්ගේද වැටුප් වැඩි කෙරෙන බවත් ඒ සඳහා ද මේ දිනවල කටයුතු කෙරෙන බවත් දැනගන්නට ඇත.