(නිමල කොඩිතුවක්කු)

මෝටර් රථ ආනයනය නතර කිරීමට රජය ගත් තීරණය හේතුවෙන් මෙරට වාහන අලෙවිසැල්වලින් සීයට අනූවකට වඩා වැඩි ප්‍රමාණයක් වැසී ගොස් ලක්ෂ හතරක පමණ ප්‍රමාණයකට රැකියා අහිමි වී ඇතැයි ලංකා මෝටර් රථ ආනයනකරුවන්ගේ සංගමයේ ලේකම් ප්‍රසාද් කුලතුංග මහතා ලංකාදීපයට පැවසීය.

රටේ පවතින උග්‍ර ඩොලර් හිඟය හේතුවෙන් තවත් වසර ගණනාවකට මෝටර් රථ ආනයනය සිදු කිරීමට නොහැකි වනු ඇති බවත් කුලතුංග මහතා සඳහන් කළේය.

මෝටර් රථ ආනයනය නතර කිරීම හේතුවෙන් ජනතාව වැඩි වශයෙන් මිලදි මිලදී ගනු ලබන සුසුකි  වැගන් ආර්, ටොයටා පැසෝ, ටොයටා විට්ස්,  ටොයටා ඇක්සියෝ, ටොයටා ප්‍රිමියෝ, ටොයටා රයිස්,  සී. එච්. ආර්, වෙසල්, ග්‍රේස් ඇතුලු මෝටර් රථ වෙළදපොල තුළ උග්‍ර හිඟයක් පවතින බවද ඔහු පැවසීය.

මෝටර් රථ ආනයනය කිරීමට රජය අවසර ලබා නොදීම හේතුවෙන් සේවකයන්ට වැටුප් ගෙවීමට නොහැකිව, බැංකු ණය ගෙවීමට නොහැකිය වාහන අළෙවිකරුවන් විශාල මූල්‍ය අර්බුදයකට පත්ව ඇතැයිද ඔහු පැවසීය.

ලියාපදංචි කළ  වාහන මිලද සීඝ්‍රයෙන් ඉහල ගොස් පාරිභෝගිකයින් දැඩි අසීරු තත්ත්වයකට පත්ව ඇති බවත් කුලතුංග මහතා සඳහන් කළේය.

කොරෝනා වයිරසය ව්‍යාප්තිය සමග ඇතිවූ ආර්ථික අර්බුදය හමුවේ මෝටර් රථ ආනයනය කිරීම ඉකුත් වසරේ මාර්තු 19 වැනිදා සිට අත්හිටුවීමට රජය පියවර ගනු ලැබීය.