(මනෝප‍්‍රිය ගුණසේකර)

හිටපු අමාත්‍ය බැසිල් රාජපක්‍ෂ මහතා සහ දිවි නැඟුම දෙපාර්තමෙන්තුවේ හිටපු අධ්‍යක්‍ෂ ජනරාල්ට එරෙහිව පවරා ඇති නඩුව විභාග කිරීම සඳහා වෙනත් උසාවියකට යොමු කිරීම සම්බන්ධයෙන් වු තීන්දුව බදාදා (15) ප‍්‍රකාශයට පත් කරන බව කොළඹ මහාධිකරණ විනිසුරු ගිහාන් කුලතුංග මහතා අද (13) දැනුම් දුන්නේය.

පසුගිය ජනාධිපතිවරණයේදී හිටපු ජනපති මහින්ද රාජපක්‍ෂ මහතාගේ රුව ඇතුළත් දිවිනැඟුම දෙපාර්තමේන්තුවේ මුදලින් ලිත් ලක්‍ෂ 50ක් මුද්‍රණය කර රජයට රුපියල් කෝටි දෙකකට පාඩුවක් සිදු කළ බවට චෝදනා එල්ල වී ඇත.

මෙම නඩුව විභාග කිරීම සඳහා කැඳවනු ලැබු අවස්ථාවේදී විත්තිකරුවන් වෙනුවෙන් පෙනී සිටි ජනාධිපති නීතීඥ අනිල් සිල්වා මහතා කරුණූ ඉදිරිපත් කරමින් නඩුව මෙම අධිකරණයේ විභාග නොකොට එය විභාග කිරීම සඳහා වෙනත් අධිකරණයකට යොමු කරන්නැයි කළ ඉල්ලීමක් සැළකිල්ලට ගත් විනිසුරු එලෙස නියම කළේය.

හිටපු අමාත්‍ය බැසිල් රාජපක්‍ෂ මහතාට අමතරව මෙම නඩුවෙන් චෝදනා ලැබ සිටින්නේ දිවි නැඟුම දෙපාර්තමෙන්තුවේ හිටපු අධ්‍යක්‍ෂ ජනරාල් ආර්.ඒ.පී. රණවක මහතාය.

මෙම විත්තිකරුවන් දෙදෙනාටම එරෙහිව නීතීපතිවරයා විසින් මෙම චෝදනාවම යටතේ මුලින් නඩුවක් පවරා තිබු අතර තාක්‍ෂණික දෝෂයක් බව කියමින් නීතීපතිවරයා විසින් එම නඩුව ඉල්ලා අස්කර ගත් අතර ඉන් දින දෙකකට පසුව එම තාක්‍ෂණික දෝෂය නිවැරදි කරමින් නිතීපතිවරයා විසින් යළිත් වරක් නඩු පවරනු ලැබීය.