බස්නාහිර මහානගර ව්‍යාපෘතිය ඔස්සේ මහා සංවර්ධනයක් සඳහා කොන්ක‍්‍රීට් වනාන්තරයක් ඇති කිරීම සිදු නොකරන බවත්, මුළු රටටම ගැළපෙන අයුරින් විධිමත් ග‍්‍රාමීය හා නාගරික සැලැස්මක් ක‍්‍රියාත්මක කිරීමට සියල්ල සූදානම් බවත් මහා නගර හා බස්නාහිර සංවර්ධන අමාත්‍ය අමාත්‍ය චම්පික රණවක මහතා පැවසීය.

බැද්දගාන තෙත්බිම් උද්‍යානය විවෘත කිරීමේ උත්සවයට සහභාගී වෙමින් එසේ කී ඇමැතිවරයා තමන් 2008 වසරේ පරිසර ඇමතිවරයා ලෙස කටයුතු කරද්දී මධ්‍යම පරිසර අධිකාරිය සහ සම්පත් පාය අවට ප‍්‍රදේශය  හරිත කවයක් ලෙස නම් කිරීමට කටයුතු කළ බවත් එහි පළමු කොටස ලෙස ඩෙන්සිල් කොබ්බෑකඩුව මාවත හරිත කවය ලෙස දියුණු කළ බවත් කීවේය.

ශ්‍රී ජයවර්ධනපුර පරිපාලන අගනගරයෙහි, අධිනාගරීකරණය වූ ප‍්‍රදේශයක නව පාර්ලිමේන්තු සංකීර්ණය අසල සුන්දර දියවන්නා ඔය අසබඩ පිහිටි බැද්දගාන තෙත්බිම ඉතා සුන්දර පරිසර පද්ධතියකි. මෙය වනජීවී සංරක්‍ෂණ දෙපාර්තමේන්තුව මගින් ප‍්‍රකාශිත ශ්‍රී ජයවර්ධනපුර කොට්ටේ කුරුළු අභය භූමියේ මායිමටද ඇතුළත් වේ. මෙම සොඳුරු භූමියේ සුන්දරත්වයට හානි නොවන අයුරින් හා එහි සුන්දරත්වය දෙස් විදෙස් සංචාරකයන්ට නැරඹිය හැකි අයුරින් නාගරික සංවර්ධන අධිකාරිය මගින් ‘බැද්දගාන තෙත්බිම් උද්‍යානය’ නිර්මාණය කර තිබේ.

IMG_4870 IMG_4871 IMG_4872 IMG_4874 IMG_4875