(අංජුල මහික වීරරත්න සහ සුජිත් හේවාජුලිගේ)

පාස්කු ප්‍රහාරය සම්බන්ධයෙන් විදේශීය විමර්ශනයක් අවශ්‍ය බව සමගි ජන බලවෙිගයේ පුත්තලම දිස්ත්‍රික් මන්ත්‍රී නිරෝෂන් පෙරේරා මහතා සභාව කල් තැබීමේ යෝජනාවක් ඉදිරිපත් කරමින් පාර්ලිමේන්තුවේදී අද (21) පැවසීය.

පාස්කු ඉරිදා ප්‍රහාරය පිළිබඳ සභාව කල්තැබීමේ විවාදය අරඹමින් නිරෝෂන් පෙරේරා මහතා කීවෙි සත්‍ය හෙලි කර ගැනීම සඳහා  දේශිය  යාන්ත්‍රණයක් මඟින් ප්‍රමාණවත් උත්සාහයක් නොගැනීම නිසා විදේශීය විමර්ශනයක් පැවැත්වීමට අවශ්‍ය බවයි.

පාස්කු ඉරිදා ප්‍රහාරය  දේශපාලන කුමන්ත්‍රණයක් බවට චෝදනා එල්ල වෙමින් තිබෙන බවද මේ පිළිබඳව දේශීය වශයෙන් පරීක්ෂණ රැසක් සිදුවී ඇති නමුත් කිසිදු ඵලක් ලැබී නැති බව ද  මන්ත්‍රීවරයා කීය.

ජාත්‍යන්තර මාධ්‍ය ආයතනයක් විසින් ප්‍රකාශ කරන ලද වීඩියෝවකින් ගෝඨාභය රාජපක්ෂ මහතා බලයට ගෙන ඒම සඳහා පාස්කු ප්‍රහාරය එල්ල කරන  ලද  බවට චෝදනා එල්ල කර තිබෙන බවද නිරෝෂන් පෙරේරා මහතා පැවසීය.

වසර හතරකට අධික කාලයක් ගත වී ඇතත් මෙතෙක් පාස්කු ප්‍රහාරය සඳහා සෘජුව වගකිව යුතු පාර්ශව හඳුනා ගැනීමටත් ප්‍රහාරයේ අරමුණ හෙළි කිරීමටත් රජය අපොහොසත් වී තිබෙන බව මන්ත්‍රීවරයා කීය.

ප්‍රහාර මාලාව සම්බන්ධයෙන් චෝදනා එල්ල වූ ආරක්ෂක අංශවල අය තවමත් තනතුරු දරමින් සිටින අතර ඔවුන් තාවකාලිකව තනතුරුවලින් ඉවත් කර අපක්ෂපාතී පරීක්ෂණයක් කළ යුතු බවද  නිරෝෂන් පෙරේරා මහතා වැඩිදුරටත් සඳහන් කළේය.