(ශාන්ත ප්‍රදීප් කුමාර කුලරත්න සහ බිමල් ශ්‍යාමන් ජයසිංහ)

රාත්‍රි මුර සංචාරයේ යෙදී සිටියදී  මාර්ගයේ ගමන් ගත් මෝටර් රථයක් පරීක්ෂා කිරීමට ගිය පොලිස් නිලධාරීන්ට  පරුෂ වචනයෙන් බැණ තර්ජනය කිරීමේ චෝදනාව යටතේ විශ්‍රාමික කථිකාචාර්ය වරයෙකු සහ විශේෂඥ වෛද්‍යවරයෙකු  අත්අඩංගුවට ගෙන ඇප මත  අද (23) දා මුදා හැරි බව මත්තේගොඩ පොලිසිය පවසයි.

මෙසේ ඇප මත නිදහස් වූයේ  මත්තෙගොඩ ප්‍රදේශයේ පදිංචි ශ්‍රී ජයවර්ධනපුර විශ්වවිද්‍යාලයේ විශ්‍රාමික කථිකාචාර්ය වරයෙකු හා  හෝමාගම මූලික රෝලේ සේවයේ නිරත  නාවල ප්‍රදේශයේ පදිංචි විශේෂඥ වෛද්‍යවරයෙකු බව පොලීසිය කියයි .

කථිකාචාර්යවරයාගේ නිවසේ ඊ‍යේ (22) දා  රාත්‍රි  මත්පැන් සාදයක් පවත්වා ඇති අතර ඊට  සහභාගි වූ විශේෂඥ වෛද්‍යවරයා ඇරලවීම සඳහා ඔහුගේ මෝටර් රථයෙන්  නාවල ප්‍රදේශයට යාම සදහා පාන්දර 4.00 ට  පමණ  පිටත් වී තිබේ.

එම අවස්ථාවේදී අධික වේගයෙන් ධාවනය වූ මෝටර් වගයක් මත්තෙගොඩ ඉන්ධන පිරවුම්හල  ආසන්නයේදී මත්තේගොඩ පොලිසියේ නිලධාරීන් කණ්ඩායමක් නවතා පරීක්ෂාකර තිබේ .

එම අවස්ථාවේදී  මෝටර් රථය පදවමින් සිටි විශේෂඥ වෛද්‍යවරයා  බීමතින් සිට ඇති ඒ පිළිබඳ වූ වරද පහදා දී අත්අඩංගුවට ගැනීමට යාමේදී මෝටර් රථයේ අනෙක් පස රැඳී සිටි කථිකාචාර්යවරයා මෝටර් රථයෙන් බැස තමන් උසස් පොලිස් නිලධාරින් හඳුනන බව පවසමින්  නිලධාරීන්ගේ  පරීක්ෂාකිරීම් වලට බාධා කරමින් පරුෂ වචනයෙන් බැණ තර්ජනය කරමින් කලහකාරීව හැසිරී ඇති බව පොලිසිය කියයි.

එහිදී  අවස්ථා කිහිපයකදී  කථිකාචාර්ය වරයා උසස් පොලිස් නිලධාරීන් හඳුනන බව පවසමින් ඔවුන්ට දුරකථන ඇමතුම් පවා ලබා දී ඇති අතර ඊට ප්‍රතිචාර නොදැක්වීම නිසා උසස් නිලධාරීන්ට ද පරුෂ වචනයෙන් බණිමින් කලහකාරීව හැසිරී ඇති අතර එම අවස්ථාවේදී  විශේෂඥ වෛද්‍යවරයා පොලිස් නිලධාරීන්ට බැණ තර්ජනය කර නොමැති බවද පොලිසිය කියයි .

පසුව සිද්ධිය සම්බන්ධයෙන් රාත්‍රී මුර සංචාරයේ යෙදී සිටි පොලිස් නිලධාරීන් පොලිස් ස්ථානයට දුරකථන ඇමතුමක් ලබා දී තවත් නිලධාරී කණ්ඩායමක් එම ස්ථානයට ගෙන්වාගෙන මෝටර් රථය සහ එහි ගමන් ගත් දෙදෙනා අත්අඩංගුවට ගෙන තිබේ .

පසුව සිදු කළ  පරීක්ෂාවේදී  විශේෂඥ වෛද්‍යවරයා සහ හිටපු කථිකාචාර්ය වරයා මත්පැන් පානය කර ඇති බවට අනාවරණය වී තිබේ.

ඒ අනුව අත්අඩංගුවට ගත් වෛද්‍යවරයා බීමත්ව රිය පැදවීම හා  හිටපු කථිකාචාර්යවරයා පොලිස් නිලධාරීන්ට පරුෂ වචනයෙන් බැණ තර්ජනය කොට අයුතු බලහත්කාරය පෑම හා රාජකාරියට බාධා කිරීමේ චෝදනා යටතේ අත්අඩංගුවට ගෙන තිබිණි.

සිද්ධිය සම්බන්ධයෙන් මත්තෙගොඩ පොලිසිය ස්ථානාධිපති පොලිස් පරීක්ෂක ඉන්දික කුමාර මහතාගේ උපදෙස් මත පරීක්ෂණ පවත්වයි.

ලබන 29 වැනිදා සැකකරුවන් උසාවියට ඉදිරිපත් කිරීමට නියමිතය.