රටම ආන්දෝලනයට ලක්කළ, පාර්ලිමේන්තුවේ පවා විවාදයට ලක්වුණ ඇඹිලිපිටියේ සාදයක දී ඝාතනයට ලක්වූ තරුණයාගේ මරණය සම්බන්‍ධයෙන් සැකපිට අත්අඩංගුවට පත්ව වැඩ තහනමට ලක්ව  ඇපමත සිටින සැකකාර සහකාර පොලිස් අධිකාරිවරයා යළි සක‍්‍රීය සේවයේ පිහිටුවන්නැයි  පොලිස් කොමිසමෙන් පොලිස්පතිවරයා ඉල්ලීමක් කර යළි සේවයේ පිහිටුවීමට කඩිනමින් ක්‍රියා කළත්  පොලිස්පතිවරයා යටතේ ඇති රහස් පොලීසිය එම සිද්ධියේ සෙසු සැකකරුවන් අත්අඩංගුවට ගැනීමට ක‍්‍රියා නොකරන බව නීතීඥ විජිත ජී. පුංචිහේවා මහතා ඇඹිලිපිටිය අතිරේක මහේස්ත‍්‍රාත් ප‍්‍රසන්න ප‍්‍රනාන්‍දු මහතා ඉදිරියේ කියා සිටියේ ය.

ඇඹිලිපිටිය නව නගරය පාරේ මෙන්ඩිස් ගොඩනැගිල්ලේ මේ වසරේ ජනවාරි 04 දින රාත‍්‍රී පැවති සාදයක දී ඇඹිලිපිටිය පොලීසියේ නිලධාරීන් එහි කඩා වැදී කළ පහරදීමේ සිද්ධියකින් පසු සුමිත් ප‍්‍රසන්න ජයවර්ධන නම් විසි නව හැවිරිදි එක්දරු පියෙක් තුවාල ලබා දින තුනකට පසු මිය ගියේ ය.  එම මරණය සම්බන්‍ධ වැඩිදුර විභාගය අද (24) යළි කැඳවු අවස්ථාවේ මරණකරුගේ අයිතිවාසිකම් වෙනුවෙන් පෙනී සිටින නිතීඥ විජිත පුංචිහේවා මහතා ඉහත කරුණු අනාවරණය කළේ ය.

එම තරුණයාගේ මරණය සම්බන්‍ධයෙන් එවකට ඇඹිලිපිටිය පොලීසියේ සහකාර පොලිස් අධිකාරීව සිටි චමින්ද ධර්මරත්න යන අය රහස් පොලිසිය විසින් අත්අඩංගුවට ගෙන පෙබරවාරි 3 වැනිදා රිමාන්ඞ් කැරිණි. ඒ අතර දී ඔහුගේ වැඩ තහනම් කළ අතර පසුව ජුනි 02 දින ඇඹිලිපිටිය මහාධිකරණයෙන් කොන්දිසි මත ඔහුට ඇප නියම විය.