හැටේ දශකයේ ශ්‍රී ලංකා සිනමාවේ ජනප්‍රිය චිත්‍රපට කිහිපයකම ළමා චරිත නිරූපණය කළ තිලක් බුලත්වෙල පසුගියදා ලන්ඩන් නුවරදී ඒක පුද්ගල ගීත ප්‍රසංගයක් ඉදිරිපත් කළේය.

ළමා නළුවෙකු ලෙසින් රඟ පෑ සමයේ ඔහු හැඳින්වුයේ තිලක් පුෂ්පකුමාර ලෙසිනි. එවකට සිංහල සිනමාවේ ජනප්‍රිය රුක්මනී දෙවි, සේනාධීර කුරුප්පු, ගාමිණි ෆොන්සේකා, සුවිනීතා වීරසිංහ වැනි නලුනිලියන් බොහෝදෙනෙකු සමඟ විවිධ චරිත නිරූපණය කිරීමේ අවස්ථාව ඔහුට හිමිවිය.

‘සුදෝ සුදු, අදට වැඩිය හෙට හොඳයි,‘ මංගලිකා සහ සුජාගේ රහස‘ වැනි චිත්‍රපට බොහෝ ගණනක ඔහු රඟපෑවේය.

මෑතකදී ලන්ඩන් නුවර රූප ගතකල "චෙස්" නම්වූ ටෙලි නාට්‍යයේද ඔහු ආරාධිත චරිතයක් නිරූපණය කළේය.

කුඩා කල චිත්‍රපට කිහිපයක ළමා චරිත නිරූපණය කිරීම හේතුවෙන් පුවත්පත් සහ සඟරාවන්හි ඔහු පිළිබඳ විස්තර සහ ඡායාරූප පළවීමෙන් පසුව බොහෝ දෙනෙකු ඔහු දැන හඳුනාගත් බවත් ඒ නිසා තමන්ගේ නිදහසට ඇතිවූ අවහිරතා පිළිබඳව අකමැත්තක් ඇතිවීමේ හේතුවෙන් චිත්‍රපට වල පෙනී සිටීමෙන්  ඉවත්වීමට සිතු බව ඔහු කියයි.

කෙසේවුවද කුඩා කලසිටම ඔහු ගීත ගායනය පිළිබඳව ඔහුතුල තිබුණේ අති මහත් ආශාවකි. මෙනිසා කළින් කළ ඔහු සිය හිත මිතුරන් හා එකතුව ගීත ප්‍රසංග පැවැත්වීමට පුරුදුවී ඇත.

දැනට ලන්ඩන් නුවර පදිංචිවී සිටින තිලක් පසුගියදා තම ඒක පුද්ගල ගීත ප්‍රසංගයක් ඉදිරිපත් කිරීමට අදහස් කළේ මෙවන් පසුබිමක් ඇතිවය.

ඔහුගේ ප්‍රසංගය සඳහා සංගීතය සැපවුයේ ධම්මික තුසිත කුමාර ගේ අධීක්ෂණය යටතේ විමර්ශා ජයසිංහ, ටිරෝන් ලියනගේ, දේශප්‍රිය විශ්වජිත්, සංජය ප්‍රනාන්දු සහ නන්ද සඳගිරි විසිනි.

ලන්ඩනයේ පදිංචි ප්‍රවීණ ගායන ශිල්පීන් වන සුවිනීතා පෙරේරා,ලසන්ති බමුණුආරච්චි යුග ගායනයෙන්ද චන්දන ෆොන්සේකා, සිසිර අත්තනායක සහ ලක්සිත් බමුණුආරච්චි ආරාධිත ශිල්පීන් වශයෙන්ද මෙම ප්‍රසංගයට එක් වුහ.