පැමිණිල්ලක විමර්ශන තොරතුරු දෙන්න සැරයන් නෝනා කතකගෙන් ලක්ෂයක් ඉල්ලලා

(ශ්‍රීනාත් ප්‍රසන්න ජයසූරිය)

කුරුණෑගල මූලස්ථාන පොලිසියේ ළමා හා කාන්තා කාර්යාංශයට කර තිබූ පැමිණිල්ලක විමර්ශනවලට අදාළ තොරතුරු එම පැමිණිලිකාර කාන්තාවගේ අතට පත් කර ඒ වෙනුවෙන් රුපියල් ලක්ෂ එකහමාරක මුදලක් ඇයගෙන් ඉල්ලුවේ යැයි කියන එම කාර්යාංශයේ සැරයන්වරියකට එරෙහිව විමර්ශන ආරම්භ කළ බව කුරුණෑගල මූලස්ථාන පොලිසිය පවසයි.

එම මුදල ඉල්ලා මෙම සැරයන්වරියට අයත් යැයි පැවසෙන බැංකු ගිණුමද එම පැමිණිලිකාර කාන්තාවට යවා තිබෙන බව පරීක්ෂණ වලින් හෙළි වී ඇතැයි කුරුණෑගල මූලස්ථාන පොලිසිය පැවැසීය.

කුරුණෑගල මූලස්ථාන පොලිසියේ ළමා හා කාන්තා කාර්යාංශයේ රාජකාරි කරන වෙනත් සැරයන්වරියක මේ හා සම්බන්ධයෙන් කුරුණෑගල මූලස්ථාන පොලිස් ස්ථානාධිපති ප්‍රධාන පොලිස් පරීක්ෂක චන්න කොබ්බෑවෙල මහතාට පැමිණිලි කර ඇත.

මෙම සැරයන්වරියට එරෙහිව පරීක්ෂණ පොලිසිය ආරම්භ කර ඇත්තේ ඉන් පසුවය.

මෙම සිද්ධියට අදාළ වැදගත් තොරතුරු රැසක් මේ වන විටත් අනාවරණය වී ඇතැයි පොලිස් ආරංචි මාර්ග සඳහන් කරයි.