සමිත් බෝධිපක්ෂ (චීනයේ බීජිං නුවර සිට)

නවීකරණය යනු සියලු රටවලට අහිමි කළ නොහැකි අයිතියක් බවත්, එහෙත් බටහිර රටවල් ඒ සඳහා සිදු කරන ප්‍රවේශය මඟින් දියුණු වෙමින් පවතින රටවලට අපමණ දුක් ගෙන දී ඇති බවත් චීන ජනාධිපති ෂි ජින්පින්ග් මහතා පැවසීය.

ඔහු මේ බව පවසා සිටියේ අද (5) චීනයේ බීජිං නුවරදී ආරම්භ වූ චීන අප්‍රිකා සමුළුවේ (FOCAC) සමාරම්භක උත්සවයට සහභාගි වෙමිනි.

නවීකරණය සාධාරණ, ජනතාවට මුල්තැන දෙන සහ  සාමය සහ ආරක්‍ෂාව මත පදනම් වන ප්‍රවේශයකින් සිදු කළ යුතු බවත්, එය විවෘත හා ඒකාබද්ධව ජයග්‍රහණය කළ හැකි අන්දමින් ක්‍රියාත්මක කළ යුුතු බවත් ඔහු කීය.  

අප්‍රිකාව සමඟ පරිපාලන අත්දැකීම් හුවමාරුව වැඩි කිරීමටත්, එම කලාපයේ සියලු රටවලට ඔවුන්ගේ ජාතික තත්ත්වයන්ට ගැළපෙන නවීකරණ මාර්ග ගවේෂණය කිරීමට සහාය වීමට සහ සියලු රටවලට සමාන අයිතිවාසිකම් සහ සමාන අවස්ථා සහතික කිරීමටත් චීනය සූදානම් බවද ජනාධිපතිවරයා පවසා සිටියේය.

ඒ සඳහා කර්මාන්ත, කෘෂිකර්මය, යටිතල පහසුකම්, වෙළෙඳාම සහ ආයෝජන සම්බන්ධයෙන් අප්‍රිකාව සමඟ සහයෝගිතාව ගැඹුරු කිරීමට, එක් තීරයක් එක් මාවතක් සහයෝගිතා ව්‍යාපෘති ප්‍රවර්ධනය කිරීමටත් චීනය සූදානම් බවද ඒ මහතා සඳහන් කළේය.

එසේම හවුල්කාරීත්ව ක්‍රියාමාර්ග 10ක් ඔස්සේ අප්‍රිකාව දියුණු කිරීම සඳහා පියවර ගන්නා බව කී හෙතෙම ඒ සඳහා චීන රජය විසින් ඉදිරි වසර තුන තුළ යුවාන් බිලියන 360ක මූල්‍යාධාර ලබා දෙන බවද කියා සිටියේය.

චීන අප්‍රිකා සමුළුව ඊයේ (4) ආරම්භ වූ අතර එය හෙට (6) දක්වා ක්‍රියාත්මක වීමට නියමිතය. මේ සඳහා අප්‍රිකානු කලාපයේ රටවල රාජ්‍ය නායකයන්, මැති ඇමතිවරුන් සහ නිලධාරීහු රැසක් සහභාගි වෙති. අද දින පැවැති සමාරම්භක අවස්ථාවට එක්සත් ජාතීන්ගේ සංවිධානයේ මහලේකම් අන්ටෝනියෝ ගුටෙරෙස් මහතාද සහභාගි වී සිටියේය.

මෙම චීන අප්‍රිකා සමුළුව 2000 වසරේදී ආරම්භ වූ අතර, එය වසර දෙකකට වරක් පැවැත්වෙයි.