(යොහාන් භාසුර)

වර්තමාන ආණ්ඩුව සම්මත කිරීමට සූදානම් වන විදුලි පනත පනතක් ලෙස නම් කළ නොහැකි අතර එය සම්පූර්ණයෙන්ම විදුලිබල මණ්ඩලය විකිණීමට සකස් කළ ටෙන්ඩරයක් බව ඒකාබද්ධ ජාතික නිදහස් විදුලි සේවක සංගමයේ කැඳවුම්කරු මාද්දුගොඩ ගමගේ මහතා අද (13) පැවසීය.  

ඒකාබද්ධ ජාතික නිදහස් විදුලි සේවක සංගමය විදුලි පනතට විරෝධය දක්වමින් කොළඹදී අද (13) පැවැත්වූ විශේෂ මාධ්‍ය හමුවේදී මාද්දුගොඩ ගමගේ මහතා එසේ පැවසීය.  

විදුලි පනතේ පළමු පිටුවේ 1969 අංක 17 දරණ විදුලි පනත සහ 2009 අංක 20 දරණ විදුලි පනත පරිචින්න කිරීම ලෙස සහ දෙවැනි පිටුවේ කොටස් වෙළෙඳපොල ලැයිස්ගත කිරීම සහ රාජ්‍ය පුද්ගලික හවුල් ව්‍යාපාර පිළිවෙත් ලෙස සඳහන්ව ඇති බවත් පළමු පිටුවෙන්ම විදුලිබල මණ්ඩලය විකුණා අවසන් බවත් ඒ මහතා පැවසීය.

පනතේ සියලුම පිටුවල 2007 සමාගම් පනත තුළ සමාගම් නිර්මාණය, එම සමාගම්වල කොටස් බෙදෙන ආකාරය, එම සමාගම්වල පරදු දරන්නන් ලියාපදිංචි කරන්නේ කොහොමද, ප්‍රතිපත්ති හදන්නේ කොහොමද ලෙස පවතින බව කී ගමගේ මහතා ආණ්ඩුව සමස්ත මහජනතාව සහ සමස්ත විදුලි සේවයන් රැවැට්ටු බව ද සඳහන් කළේය.

රංජන් ජයලාල් එදා මෙම විදුලි පනත ගිනි තබා පාර්ලිමේන්තු බලය ගෙන අවසානයේ කඩුවෙල නගරාධිපති බවට පත්වූ බවත් බලයක් නොමැතිව දියාරු වූ ආණ්ඩුවක් ගෙන ආ පනතක් වර්තමාන ආණ්ඩුව එහෙම්පිටින්ම කර තියාගෙන යන බව කී ගමගේ මහතා අනුර කුමාර ජනාධිපතිවරයා පවා විදුලිබල මණ්ඩලය කොටස්වලට කැඩීමට හේතුව නොදන්නා බව ද සඳහන් කළේය.  

විදේශ රටවලින් විදුලිය ආනයනය කිරීමක් පිළිබඳව එම පනතේ ඇතුළත්ව තිබුණ ද රටට එවැනි අවහ්‍යතාවක් නොමැති බවත් රට තුළ ඕනෑ තරම් විදුලිය ඇති බවත් ඔහු කීය.

2024 අංක 36 දරණ විදුලිබල පනත ගිනි තබා පනත අවසන් කරනවා යැයි පවසා වර්තමාන ජනාධිපතිවරයා සහ මන්ත්‍රීවරු විදුලිබල මණ්ඩලයේ සේවකයන් 22,000 ක ඡන්ද සියයට 98 ක් පමණ ලබාගෙන බලය ගත් බවත් එම පනත ගිනි තියෙනවා යැයි පවසා පාර්ලිමේන්තුවට ගිය මෙම පිරිස අගේට එය සම්මත කරන බවත් ගමගේ මහතා පැවසීය.

විදුලිබල මණ්ඩල පෞද්ගලීකරණය කිරීමේ අවශ්‍යතාවක් නොමැති අතර ප්‍රතිව්‍යුහගතකරණය කර කළමණාකාරිත්වය වෙනස් කර සේවකයන්ට සහ පාරිභෝගිකයන්ට ලාභ ලබන ආයතනයක් බවට පත්කළ හැකි බව ද ඒ මහතා වැඩි දුරටත් සඳහන් කළේය.

ලංකා විදුලි බල මණ්ඩලයේ කාර්යාල සේවා සමිති සංගමයේ සභාපති රසික විජේසිංහ මහතා ද මෙම මාධ්‍යහමුවට සහභාගි විය.