(ඉන්දිකා රාමනායක සහ බිමල් ශ්‍යාමන් ජයසිංහ )

අධික වේගයෙන්  ධාවනය  වු  සුඛෝපභෝගී  මෝටර් රථයක් අද (5)  පස්වරුවේ කොළඹ කුරුදුවත්ත   නිදහස්  වටරවුමේ රථවාහන හැසිරවීමේ රාජකාරියේ නිරත සිටි  පොලිස් කොස්තාපල්වරයකු ද යටකරගෙන  යාම හේතුවෙන්   එම කොස්තාපල්වරයා බරපතල තුවාල ලබා කොළඹ ජාතික රෝහලට ඇතුළත් කර ඇති බව පොලිසිය කියයි.
 වේගයෙන් ධාවනය වු එම සුඛෝපභෝගී මෝටර් රථය කොස්තාපල්වරයාගේ ඇගේ හැපීමෙන්  ඔහු ඉවතට  විසිවී ගොස්  අසල තිබු පොකුණට  ඇද වැටීමෙන්  මෙලෙස බරපතල තුවාල ලබා ඇති බව පොලිසිය පවසයි.
අනතුරින් කොස්තාපල්වරයාගේ හිසට බරපතල තුවාල සිදුව ඇති බවත්,  ඔහු  අසාධ්‍ය තත්ත්යෙන් දැඩි සත්කාර ඒකකයේ ප්‍රතිකාර ලබන බවද පොලිසිය පවසයි.
කොස්තාපල්වරයා  ගේ ඇගේ ගැටුන   මෝටර් රථය ද  වේගය පාලනය කර ගැනීමට නොහැකිව ඒ අසල පිහිටි වටරවුමේ  මතින්   පොකුණ වෙත    ඇදී ගොස් නතර වී තිබු බවද පොලිසිය පවසයි.
 සිද්ධියෙන් තුවාල ලබා ඇත්තේ කුරුදුවත්ත පොලිසියට අනුයුක්තව රථවාහන රාජකාරි කරමින් සිටි මනෝජ් ප්‍රියංකර (19498)  නමැති කොස්තාපල්වරයා බව පොලිසිය පවසයි.
ඔහු මීට වසර තුනකට පමණ පෙර පොලිසියට බැදී සිටි කොස්තාපල්වරයකු බවද පොලිසිය පවසයි.
මෙම  රථය නන්දා මෝටර් දෙසින් නිදහස් මාවත දක්වා ගමන් ගෙන ඇති අතර, පොලිස් කොස්තාපල්වරයා  වටරවුම ආසන්නේ   රථවාහන හැසිරවීමේ රාජකාරියේ නිරතව  සිටියදි වේගයෙන් පැමිණ මෙම රථයේ  කොස්තාපල්ගේ ගැටී ඇති බවද පොලිසිය පවසයි.
සැකකරු  තොරතුරු තාක්ෂණ ඉංජිනේරුවරයෙක් වශයෙන් කටයුතු කරන (28) හැවිරිදි තරුණයකු වන අතර ඔහු අවස්ථාව්දීම අත්අඩංගුවට ගෙන ඇත.

(ළහිරු හර්ෂණ)