දේශීය සීනි මිල අඩු කරන්න එතනෝල් මිල වැඩි කරයි

(විමුක්ති එස් රුද්‍රිගු)

පිටරටින් ආනයනය කරන සුදු සීනි මෙරට වෙළෙඳපොළේ අලෙවි කරන මිලටම දේශීයව නිෂ්පාදනය කරන සුදු සීනිද අලෙවි කිරීම සඳහා දේශීය සීනි නිෂ්පාදන සමාගම් නිෂ්පාදන පිරිවැයට අඩුවෙන් දේශීය වෙළෙඳපොළට සුදු සීනි නිකුත් කරන බවත් ඉන් සිදුවන පාඩුව පියවා ගැනීම සඳහා දේශීය සීනි නිෂ්පාදන කර්මාන්තශාලා එතනෝල් ලීටරයක මිල රුපියල් 300 කින් පමණ ඉහළ දමා ඇති බවත් ආරංචි මාර්ග ප්‍රකාශ කළේය.

ඒ හේතුවෙන් මත්පැන් නිෂ්පාදන පිරිවැය මසකට කෝටි 48 කින් වැඩිවනු ඇති බවද ආරංචි මාර්ග කළේය.

මෙරට නිෂ්පාදනය කරන සීනි සඳහා සියයට 18 එකතු කළ අගය මත බද්දක් එකතු වන බවත් පිටරටින් ආනයනය කරනු ලබන සුදු සීනි සඳහා එම බද්ද අය නොවන බවත් ආරංචි මාර්ග පැවැසුවේය.

එතනෝල් යනු සීනි නිෂ්පාදනයේ අතුරු ප්‍රතිඵලයක් බවත් මසකට මත්පැන් නිෂ්පාදනය සඳහා එතනෝල් ලීටර් ලක්ෂ 16 ක් පමණ අවශ්‍ය වන බවත් ආරංචි මාර්ග ප්‍රකාශ කළේය.

එතනෝල් පිටරටින් ආනයනය කිරීම නීති විරෝධී බවත් මත්පැන් සමාගම් එතනෝල් මිලදීගත යුත්තේ දේශීය සීනි නිෂ්පාදන සමාගම්වලින් බවත් ආරංචි මාර්ග පැවැසුවේය.

මෙතෙක් එතනෝල් ලීටරයක් මිලදී ගනු ලැබුවේ රුපියල් 475 ත් 500 ත් අතර මිලකට බවත් දැන් ලීටරයක මිල සීනි නිෂ්පාදන සමාගම් රුපියල් 800 දක්වා ඉහළ දමා තිබෙන බවත් ආරංචි මාර්ග ප්‍රකාශ කළේය. මෙරට දේශීය සීනි නිෂ්පාදන සමාගම් 4 ක් තිබෙන බවත් පැලවත්ත සහ සෙවණගල සීනි කර්මාන්ත ශාලාවල අයිතිය තිබෙන්නේ රජයට බවත් ඇතිමලේ සීනි කර්මාන්තශාලාවේ සියයට 50 ක අයිතිය තිබෙන්නේ රජයට බවත් ආරංචි මාර්ග පැවැසුවේය. අනෙක් කර්මාන්තශාලාව සියයට සියයක් පුද්ගලික එකක් බවද ආරංචි මාර්ග ප්‍රකාශ කළේය.

අඩුමිල මත්පැන් නිෂ්පාදනවල වැඩි ප්‍රතිශතය තිබෙන්නේ එතනෝල් බවත් ඒ හේතුවෙන් අති විශේෂ අරක්කු බෝතලයක මිල රුපියල් 120 කින් වැඩි කිරීමට සිදුවනු ඇති බවත් ආරංචි මාර්ග පැවැසුවේය. දැනටමත් මත්පැන් බෝතලයක මිල ජනතාවට දරාගත නොහැකි බවත් මිල වැඩිකළ විට මත්පැන් අලෙවිය පහළ යනු ඇති බවත් ආරංචි මාර්ග ප්‍රකාශ කළේය. එවිට මත්පැන් නිෂ්පාදන සමාගම් එතනෝල් මිලදී ගන්නා ප්‍රමාණය අඩු කරනු ඇති බවද ආරංචි මාර්ග පැවැසුවේය.