එෆ්.අස්ලම්                        

                         
දෙමළ ජාතික සන්ධානය එක්සත් ජාතික පක්ෂයට සහාය පලකිරීමේ රහස මහින්ද රාජපක්ෂ මහතා කෙරෙහි දෙමළ ජනතාව තුළ පවතින අවිශ්වාසය හා අප්‍රසාදය යැයි දෙමළ ජාතික සන්ධාන පාර්ලිමේන්තු මන්ත්‍රී ධර්මලිංගම් සිද්ධාර්ථන් මහතා  පැවසීය.


ටෙලෝ සංවිධානයේ නියෝජිතයින් හා එම සංවිධානයේ නායක පාර්ලිමේන්තු මන්ත්‍රී ධර්මලිංගම් සිද්ධාර්ථන් අතර පැවති විශේෂ සක්ච්ඡාවකදී සිද්ධාර්ථන් මහතා මේ බව කියා සිටියේය.


ඇතැම් පාර්ශව රටේ වත්මන් දේශපාලන අර්බුදකාරී තත්වය හමුවේ දෙමළ ජාතික සන්ධානය මධ්‍යස්ථව සිටිය යුතුයි කියල කියනවා. නමුත් මෙවන් තත්වයක එසේ කටයුතු කරනවා කියල කියන්නේ මහින්ද රාජපක්ෂට අපි සහාය පලකරනවා හා සමාන ක්‍රියාවක්.


දෙමළ ජනතාව කිසි විටක මහින්ද රාජපක්ෂව පිළිගන්නෙ නැහැ. ඒ හේතුව නිසා තමයි අපි එක්සත් ජාතික පක්ෂයට සහාය පලකරන්න  තීරණය කළේ.


ඒ වගේම දැන් මෛත්‍රිපාල සිරිසේන ජනධිපතිවරයා රනිල් වික්‍රමසිංහට කුමන හේතුවක් උඩ හෝ යළි අගමැතිකම් නොදෙන බව කියනවා. පාර්ලිමේන්තු මහ මැතිවරණයක් පවත්වා එයින් එක්සත් ජාතික පක්ෂය ජය ගෙන එම පක්ෂය විසින් නැවතත් අගමැති ධූරයට රනිල්වම නම් කළ හොත් ජනාධිපතිවරයාට ඔහුව අගමැති වශයෙන් පිළිගන්නම වෙනවා.


පාර්ලිමේන්තු මහ මැතිවරණයක් ජනාධිපතිවරයා විසින් කැඳවා තිබියදී එක්සත් ජාතික පක්ෂ ආණ්ඩුවක් පිහිටුවා ගැනීමෙන් රටේ උද්ගතව ඇති දේශපාලන අර්බුදය තවත් උග්‍ර වනු ඇත. රටේ ප්‍රධාන දේශපාලන පක්ෂ දෙකම තම පාලනය යටතේ මහ මැතිවරණයක් පැවැත්විය යුතුයි කියන මතයේ කටයුතු කරනවා. මෙයින් සුළු ජාතිකයින්ට කිසිදු සෙතක් අත්වන්නේ නැහැ යැයිද සිද්ධාර්ථන් මහතා පැවසීය.