(තිළිණි ද සිල්වා)

හිටපු කෘෂිකර්ම අමාත්‍ය සහ පාර්ලිමේන්තු මන්ත‍්‍රී දුමින්ද දිසානායක මහතා ජනාධිපති පරීක්ෂණ කොමිෂන් සභාවේ පොලිස් ඒකකය හමුවේ අද (30) පැය හතකට වැඩි කාලයක් ප‍්‍රකාශ ලබා දී ඇතැයි එම කොමිසමේ  ප‍්‍රකාශකයෙකු ලංකාදීපයට පැවසීය.

කෘෂිකර්ම අමාත්‍යාංශය රුපියල් මිලියන 21 ක මාසික කුලියට බත්තරමුල්ල පිහිටි ඞී.පී.ජයසිංහ ගොඩනැගිල්ලට රැගෙන යාමෙන් රජයට පාඩු සිදුව ඇතැයි කියමින් එම ජනාධිපති පරීක්ෂණ කොමිසම හමුවේ ගොනු කළ පැමිණිල්ලට අදාළව එම පොලිස් ඒකකයේ නිලධාරීන් දුමින්ද දිසානායක මහතා ගෙන් ප‍්‍රශ්න කර ප‍්‍රකාශ සටහන් කර ගත් බව එම ප‍්‍රකාශයා වැඩිදුරටත් කීය.

ඒ අනුව අද (30) පෙරවරු 9.30 සිට පස්වරු 5.00 දක්වා කාලය පුරා හිටපු අමාත්‍යවරයාගෙන් එම පොලිස් නිලධාරීන් ප‍්‍රකාශ ලබා ගෙන ඇත.

කෘෂිකර්ම අමාත්‍යාංශය පවත්වා ගෙන ගිය ගොවිජන මන්දිරය පාර්ලිමේන්තු කාරක සභා කාර්යාල සඳහා අවශ්‍ය වූ හෙයින් අමාත්‍යාංශය වෙනත් ස්ථානයකට රැගෙන යාමට සිදුවූ බවත් , ඊට සුදුසු ස්ථාන කිහිපයක්ම පරීක්ෂා කළද බත්තරමුල්ල පිහිටි ඞී.පී.ජයසිංහ ගොඩනැගිල්ල හැර පහසුකම් සහිත වෙනත් ස්ථාන හමු නොවු බව හිටපු කෘෂිකර්ම අමාත්‍යවරයා පොලිස් නිලධාරීන් හමුවේ ප‍්‍රකාශ කර ඇත.

එම ගොඩනැගිල්ල තමන්ගේ තනි තීරණයකට අනුව සිදු නොවූවක් බවත් ,ඊට අග‍්‍රාමාත්‍යවරයා ඇතුළු කැබිනට් මණ්ඩලයේ අනුමැතිය හා ඊට අදාළ නිලධාරීන්ගේ නිර්දේශ මත සිදුවූ බවද දිසානායක මහතා පොලිස් නිලධාරීන්ගේ ප‍්‍රශ්න කිරීම් හමුවේ ප‍්‍රකාශ කර ඇත.

එසේම අමාත්‍යාංශ නව ගොඩනැගිල්ල සඳහා රුපියල් මිලියන 460ක කාර්යාල උපකරණ හා ගෘහභාණ්ඩ  ලබා ගැනීමට අදාළ සියලූම අංශ වලින් අනුමැතිය හිමිවූ බවද හෙතෙම පවසා ඇත.

කෘෂිකර්ම අමාත්‍යාංශය රුපියල් මිලියන 21ක මාසික කුලියකට බත්තරමුල්ල පිහිටි ඞී.පී.ජයසිංහ ගොඩනැගිල්ලට රැගෙන යාමෙන් රජයට පාඩු සිදුව ඇතැයි කියමින් කරන්දෙණිය සමාජ සුබසාධන සංවිධානය විසින් මෙම පැමිණිල්ල ඉදිරිපත් කර තිබුණි.