නීත්‍යනුකූල නොවන අන්දමින් අලි පැටවකු ළඟ තබාගත් බව කියන හිටපු අලුත්කඩේ අතිරේක මහේස්ත්‍රාත් තිළිණ ගමගේට ගංගොඩවිල මහේස්ත්‍රාත් අධිකරණය ලබාදුන් ඇප නියෝගය සංශෝධනය කරන්නැයි ඉල්ලා කොළඹ මහාධිකරණයේ ගොනු කළ ප්‍රතිශෝධන අයදුම්පතට අදාළව හිටපු මහේස්ත්‍රාත්වරයා වෙනුවෙන් නීතිඥ ජේ.එම්.පවුමි මහතා ඉදිරිපත් කර තිබූ මෝසමක් අද (17) විභාගයට ගැනිණි.

නීතිපති දෙපාර්තමේන්තුව වෙනුවෙන් එහිදී අධිකරණයට කරුණු දැක්වූ රජයේ අධිනීතිඥ දිලීප පීරිස් මහතා සඳහන් කළේ මෙම මෝසම ගොනු කර ඇත්තේ ජූනි 13 ලබාදුන් නියෝගය පැහැදිලි කරගැනීම සඳහා බවත් එසේ අධිකරණ නියෝග පැහැදිලි කරගැනීමට මෝසම් ගොනු කිරීම නීති විරෝධී බවත්ය.

මහාධිකරණ විනිසුරු මහිලාල් වෛද්‍යතිලක මහතා ප්‍රතිශෝධන අයැදුමට අදාළ නඩු වාර්තාව පෞද්ගලිකව කොළඹ මහාධිකරණයට ඉදිරිපත් කරන්නැයි ගංගොඩවිල අධිකරණයේ රෙජිස්ටාර්වරියට අද (17) නියෝග කළේය. එම නියෝගය ලබාදුන්නේ රජයේ අධිනීතිඥවරයා කළ ඉල්ලීමක් අනුවය.

ඒ අනුව අද මෝසම ඉල්ලා අස්කර ගැනිණි.