(අංජුල මහික වීරරත්න)

තිස්සමහාරාමයේ පුරාණ වැව් දෙකක් වන ගල්පියස්ස වැව හා පතහවැව ප්‍රතිසංස්කරණ කටයුතු ආරම්භ කළ බව කෘෂිකර්ම අමාත්‍යාංශය පවසයි.

කෘෂිකර්ම අමාත්‍යාංශය යටතේ ක්‍රියාත්මක වන දේශගුණ සුහුරු වාරි කෘෂිකාර්මික ව්‍යාපෘතිය යටතේ මෙම වැව් ප්‍රතිසංස්කරණය කෙරෙයි.

දේශගුණ සුහුරු වාරි කෘෂිකර්ම ව්‍යාපෘතිය ලෝක බැංකු ආධාර යටතේ ක්‍රියාත්මක වන ව්‍යාපෘතියකි. වැව් දෙක ප්‍රතිසංස්කරණය සඳහා වැය කිරීමට යෝජිත මුදල රුපියල් මිලියන 50කි. එමගින් ගොවි පවුල් 100කට පමණ සෙත සැලසෙන අතර මෙම වැව් දෙක යටතේ අක්කර 30ක පමණ පුරාණ කුඹුරු වී වගාවට ඉඩ සැලසෙන බව කෘෂිකර්ම අමාත්‍යාංශය පවසයි.

දීර්ඝකාලයක් තිස්සේ ප්‍රතිසංස්කරණයට ලක් නොවූ පතහවැව හා ගල්පියස්ස වැව ප්‍රතිසංස්කරණය කිරීමෙන් අනතුරුව එම වැව් ජලය උපයෝගී කර ගනිමින් වී වගාව මෙන්ම මිරිස් වගා කිරීම සඳහා ගොවීන්ට පහසුකම් සලසන බව ප්‍රතිසංස්කරණ ඇරඹීමෙි අවස්ථාවට සහභාගී වෙමින් කෘෂිකර්ම, වනජීවි හා වන සම්පත් සංරක්ෂණ අමාත්‍ය මහින්ද අමරවීර මහතා සඳහන් කළේය.