කැලණිය ප්‍රාදේශීය සභා මන්ත්‍රී හසිත මඩවල මහතා ඝාතනයට ඔත්තූ බැලූ බව කියන ත්‍රීරෝද රිය නිදහස් කරන්නැයි  කළ ඉල්ලීම මහර මහේස්ත්‍රාත් දර්ශික විමලසිරි මහත්මිය අද ඉද ඉවත දැමුවාය.

රහස් පොලීසිය අද කරුණු දක්වමින් පැවසුවේ ත්‍රීරෝද රිය නඩු භාණ්ඩයක් වන බැවින් එය මුදා හැරීමට විරුද්ධ වන බවයි. ඒ සඳහා සාක්කි ඇතැයි ද රහස් පොලීසිය දැන්වීය.

 නීතිපතිගේ උපදෙස් ඇතොත් මිස එසේ නැතිනම් ත්‍රීරෝද රිය මුදා හැරිය නොහැකි බව මහේස්ත්‍රාත්වරිය ප්‍රකාශ කළාය.

සුජීව රංග කුමාර පෙරේරා, අයේශ් චතුරංග වීරසේකර සහ අශෝක හේමන්ත පෙරේරා යන පළමු, දෙවැනි සහ තෙවැනි සැකකරුවෝ මැයි   30 වැනි දින දක්වා නැවත රිමාන්ඩ් කරනු ලැබූහ.

අමාත්‍ය මර්වින් සිල්වා මහතාගේ සම්බන්ධීකරණ ලේකම්වරුන් වන සරත් කුමාර එදිරිසිංහ හෙවත් සිංගප්පූරු සරත් සහ ඩබ්ලිව් පී සමන් නිශාමන් මීට පෙර මහාධිකරණයේ නියමය පරිදි ඇප ලදහ.

විදේශ ගතව සිටින හය වැනි සැකකරු දොන් ඉමේෂ් ඒෂාන් එදිරිසිංහ මෙතෙක් අත්අඩංගුවට ගෙන නැත.