(බිමල් ශ්‍යාමන් ජයසිංහ)

සෙල්ලම් බඩු තුළ අසුරා ඇමරිකා එක්සත් ජනපදයේ සිට ගුවන් තැපෑලෙන් එවන ලද රුපියල් කෝටි දෙකකට ආසන්න කුෂ් නමැති මත්ද්‍රව්‍ය පාර්සලය රැගෙන යාමට පැමිණි පුද්ගලයකු අත්අඩංගුවට ගත් බව පොලිස් විශේෂ කාර්ය බළකාය කියයි.

එම පාර්සලය තුළ කුෂ් මත්ද්‍රව්‍ය කිලෝ එකයි ගෑම් 367 ක් තිබූ බව පොලීසිය සඳහන් කරයි.

විශේෂ කාර්ය බළකා මුලස්ථාන කඳවුරේ විශේෂ වැටලීම් ඒකකය (, කොළඹ කලාපය ) රේගු සහ මත්ද්‍රව්‍ය නාශක කාර්යාංශයේ නිලධාරින් ගේ සහය මත වැටලීම සිදු කළ බව පොලිසිය කියයි.

සෙල්ලම් බඩු සහිත පාර්සල් වල සූක්ෂම ලෙස මත්ද්‍රව්‍ය අසුරා තිබූ බව පොලිසිය කියයි.

එය රැගෙන යාමට පැමිණි කොළඹ 14 ප්‍රදේශයේ පදිංචි වයස අවුරුදු 44 ක පුද්ගලයකු අත්අඩංගුවට ගෙන වැඩිදුර විමර්ශන සඳහා පොලිස් මත්ද්‍රව්‍ය නාශක කාර්යාංශය වෙත භාරදී ඇත.