රාජ්‍ය ප්‍රතිපත්ති සැලසුම් කරන එක්තරා "සෙන්ටර්" එකක පසුගියදාක දේශනයක් තිබුණා... ඒකට ආරාධනා ලබල තිබුණෙ රටේ උගත් බුද්ධිමත් සුළු ආරාධිත පිරිසක්... දේශකයා වුණේ ලෝකයේ ඉහළම දියුණුවක් ලබාපු රතු රටක තානාපතිතුමා.

උන්නැහේල ලංකාවෙ ආණ්ඩුව එක්ක ඉතා ළඟින් වැඩ කරන මේ ආණ්ඩුටත් වඩා ගිය ආණ්ඩුවට කිට්ටුවෙන් හිටපු කට්ටියක්... මුන්නැහේ තමන්ගෙ හරබර කතාවෙදි අපූරැ අදහසක් කිව්වෙ ලංකාවෙ වත්මන් ආණ්ඩුව සහ කැබිනට් මණ්ඩලය ගැනයි... ඒ කතාව සරලව දැක්වුවොත් මෙහෙමයි.

"මිත්‍රවරැනි, මේ ආණ්ඩුවෙ ප්‍රතිපත්තිය අපට තවම තේරැම් ගන්න අමාරැයි. ප්‍රධානම ඇමැතිවරැවත් ඒක හරියට දන්නවද කියල සැකයි. දැන් මේ ආණ්ඩුවෙ ඇමැතිල රාජ්‍ය ඇමැතිල, උප ඇමැතිල 92ක්ද කොහෙද ඉන්නව... ආණ්ඩුවෙ ප්‍රතිපත්තිය ගැන දළ අදහසක්වත් ගන්න නම් ඒ 92ම හම්බුවෙන්න වේවි. ඒත් හරි උත්තරයක් ගැනීම නම් ලේසි නැහැ." රතු තානාපතිතුමාගෙ ඒ කතාව අහල එතන හිටපු මැති ඇමැති කට්ටියත් බුද්ධිමතුන් කිහිපදෙනත් මුහුණට මුහුණ බලාගත්තලු... මොනව වුණත් උන්නැහෙගෙ කතාව ආණ්ඩුවෙ ලොක්කන්ගෙ ඇස් අරවන කතාවක් බව ඒක අහපු ඇමැති මට්ටමේ ලොක්කෙකුටම කියැවුණාලු.