වසීම් තාජුඩීන්ගේ ඝාතනය හා සම්බන්ධ සීසීටීවී කැමරා දර්ශන ඇතුලත් සංයුක්ත තැටි 10 ක් කැනඩාවේ බ්‍රිටිෂ් කොලොම්බියා රසායනාගාරයකට යැවීමට කොළඹ අතිරේක මහේස්ත්‍රාත් නිශාන්ත පීරිස් මහතා අද රහස් පොලිසියට අවසර දුන්නේය. මෙතෙක් අධිකරණය බාරයේ තිබූ තැටි රැගෙන රහස් පොලිසිය ලබන 22 වැනි දා කැනඩාව බලා යන බව ද පොලිසිය අධීකරණයට දැනුම් දුන්නේය.

එම රසායනාගාරයේ වාර්තාව රහස් පොලිසිය අධීකරණයට ඉදිරිපත් කරනු ඇත.

එසේම හිටපු රගර් ක‍්‍රීඩක වසීම් තාජුඞීන්ගේ මෘත ශරීරයේ කොටස්  අස්ථානගත වූයේ යැයි කියන සිද්ධියක් සම්බන්ධයෙන් තමා අත්අඩංගුවට ගැනීමෙන් පොලිස්පති ඇතුළු බලධාරීන් වළක්වන අතුරු නියෝගයක් නිකුත් කරන්නැයි ඉල්ලා කොළඹ හිටපු ප‍්‍රධාන අධිකරණ වෛද්‍ය නිලධාරී වෛද්‍ය ආනන්ද සමරසේකර මහතා අද (19) ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කළේය.

වසීම් තාජුඞීන් ගේ මරණය සම්බනධයෙන් මෙතෙක් සිදු කළ මූලික විමර්ශන වාර්තා අධිකරණයට ඉදිරිපත් කරන ලෙසට පොලිස්පතිට, රහස් පොලිස් අධ්‍යක්ෂකවරයාට හා අදාළ නිලධාරීන්ට නියෝග කරන ලෙසද පෙත්සම්කරු ඉල්ලයි.

වසීම් තාජුඞීන් සම්බන්ධයෙන් වන පශ්චාත් මරණ පරීක්ෂණය 2012 ජූලි මාසයේ පැවැත් වූ බවත් 2013 ජූනි මාසයේ 03 වැනිදා තම ධූරයෙන් විශ‍්‍රාම ලැබු බවත්, ඉන් පසුව මෘත ශරීර ගබඩා කර තිබූ ස්ථාන හෝ අධිශීතකරණ සම්බන්ධයෙන් කිසිදු කටයුත්තකට තමා සම්බන්ධ නොවූ බවත් කියා සිටින පෙත්සම්කරු එම මෘත ශරීර කොටස් කිහිපයක් අස්ථානගතවී ඇති බව පසුව දැනගත් බව ද කීය. ඒ සම්බන්ධයෙන් තමාට චෝදනා කරනුයේ තමා අත්අඩංගුවට ගැනීමේ සූදානමක් හෝ අවදානමක් ඇති නිසා බවද එය එසේ සිදු වුවහොත් එමඟින් සිය මූලික අයිතීන් උල්ලංඝනය වන බව ද පෙත්සම්කරු කියා සීටීයි.