(නිමන්ති රණසිංහ)

අධිකරණ අමාත්‍යංශය යටතේ පවතින ණය සහනදායක මණ්ඩලයෙන් ජනතාවට ලබා දෙන සේවාව තව දුරටත් ව්‍යාප්ත කරමින් එහි නව ශාඛාවක් ගාල්ලේදි අද (26) ආරම්භ කෙරෙන බව එම අමාත්‍යාංශය පවසයි.

ගාල්ල දිස්ත්‍රික්කයේ ආරම්භ කෙරෙන  මෙම කාර්යාලය මගින් දකුණු පළාතේ මාතර සහ හම්බන්තොට යන දිස්ත්‍රික්කවල ජනතාවට ණය සහන මණ්ඩලයෙන් වන සේවාවන් ලබාගත හැකි බවද අධිකරණ අමාත්‍යාංශය සඳහන් කරයි.

අංක 45 ඒ, ක්‍රිප්ස් පාර, ගාල්ල යන ස්ථානයේදී  එම ශාඛාව විවෘත වන්නේ අධිකරණ අමාත්‍ය ජනාධිපති නීතිඥ අලි සබ්රි මහතාගේ ප්‍රධානත්වයෙනි.

දේපලක්, උගස්කරයක් විකුනුම්කරයක්, හෝ පොරොන්දු සින්නක්කරයක් මගින් ඇපයට තබා ණයක් ලබාගෙන ඇති අවස්ථාවක එම ණය ගෙවා ගැනීමට නොහැකි ජනතාවට පිහිට වීම සඳහා ණය සහන මණ්ඩලය ආරම්භ කර ඇති බව අධිකරණ අමාත්‍යාංශය සඳහන් කරයි.

ඉඩම් කුඹුරු වතුපිටි නිවාස නිරවුල් දේපල පොරොන්දු සින්නක්කර ඔප්පු උගස් කර ඔප්පුවක් මගින් ඇපයට තබා ලබා ගන්නා ණය සම්බන්ධයෙන් හෝ එවැනි ආරක්ෂණ ණයක් සම්බන්ධයෙන් ණයගැති වී ඇති ජනතාව ණයගැති භාවයෙන් මුදවා ලීම සඳහා සහනදායී ක්‍රමවේදයක් සකස් කර දීම මෙම මණ්ඩලය මගින් සිදුකරනු ලබයි.

ණය සහනදායි මණ්ඩලය සඳහා පැමිණිලි යොමු කිරීමේ දී අවශ්‍ය විස්තර සහ ඉල්ලුම්පත් moj.gov.lk යන වෙබ් අඩවියට පිවිසීමෙන් ලබා ලබා ගත හැකි අතර, ප්‍රධාන ශාඛාව කොළඹ  දුරකථන අංක 0112697911, ගම්පහ ශාඛාව 0332060668 සහ ගාල්ල ශාඛාව 0912237431 යන දුරකථන අංකවලට ඇමතීමෙන් ලබා ගත හැකි බව ද අධිකරණ අමාත්‍යංශය සඳහන් කරයි.