(නිමන්ති  රණසිංහ)
 
ඩෙංගු රෝගයෙන් මේ වසරේ 20 දෙනකුත් පසුගිය වසරේ 150 දෙනකුත් මරණයට පත්වී ඇතැයි සෞඛ්‍ය අමාත්‍ය පවිත‍්‍රා වන්නිආරච්චි මහත්මිය පැවසුවාය.
 
කොවිඞ් වයිරසයෙන් ජනතාව ආරක්ෂා කරනවා සේම ඩෙංගු රෝගයෙන් ද ජනතාව ආරක්ෂා කර ගැනීමේ වගකීමක් අප සතු බවත්, ඒ ස`දහා ජනාධිපතිවරයාගේ උපදෙස් මත ‘ඩෙංගු මර්දන කාර්ය සාධක බලකායක්’ පිහිටුවා ඇති බවත් අමාත්‍යවරිය සදහන් කළාය.
 
අමාත්‍යවරිය මේ බව සදහන් කළේ කොවිඞ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ පැවැති මාධ්‍ය හමුවකදී ය.
 
මෙහිදි වැඩිදුරටත් අදහස් දැක්වූ අමාත්‍යවරිය මෙසේද පැවසුවාය. ඔබට අධික උණ තත්ත්වයක් ඇත්නම් එම රෝග ලක්ෂණය ඩෙංගු රෝගය වැළදීම හේතුවෙන් විය හැකියි. එවිට ඩෙංගු රෝගයට ප‍්‍රතිකාර කරනු ලබන ඔබ ප‍්‍රදේශයේ දිස්ත්‍රික්කයේ ඇති ප‍්‍රධානතම රෝහලකට යෑම වඩාත් සුදුසු වේ.
 
 ඔබේ පරිසරය පිරිසිදුව තබා ගැනීම, ඔබ අවට ගොඩනැගිලි පිරිසිදුව තබා ගැනීම ඔබේ වගකීමක් ලෙස සලකා ක්‍රියා කරන ලෙස අප ඉල්ලා සිටිනවා. කොරෝනා වයිරසය පාලනය කිරීමේ කාර්ය භාරය සදහා පළාත් පාලන ආයතන විශාල කාර්යභාරයක් ඉටුකරනු ලැබුවා. විශේෂයෙන්ම හුදෙකලා කරනු ලැබූ ප‍්‍රදේශවලට අවශ්‍ය ආහාරපාන ඇතුලූ අනෙකුත් පහසුකම් සැපයීම ආදිය සිදුකරනු ලැබුවේත් ඔවුන්. මේ හේතුවෙන් කොරෝනා වයිරසය පාලනය කිරීම සදහා සහාය  දැක්වූවා සේ ඩෙංගු රෝගය පාලනය කර ගැනීම සදහා සියලූම පළාත් පාලන ආයතන නියෝජිතයින්, පළාත් පාලන ආයතන නගරාධිපතිවරුන් මෙන්ම සභාපතිවරුවන්ගෙන් ද තවදුරටත් සහය ලබා දෙන ලෙස රජයක් ලෙස ඉල්ලා සිටිනවා.