මාලි දේශයේ උතුරු දිග හමුදා කඳවුරකට ජිහාඩ් සටන්කාමීන් විසින් එල්ල කළ ප්‍රහාරයකින් සොල්දාදුවන් 53දෙනකු සහ එක් සිවිල් වැසියකු මියගොස් ඇතැයි එරට රජය පවසයි.

මෙම ප්‍රහාරය පසුගිය දශකය තුල හමුදාවට එරෙහිව එල්ල කළ මාරාන්තිකම ප්‍රහාර වලින් එකක් බව ද ඔවුහු පවසති.

මේ වනවිට තත්ත්වය පාලනය කර ඇති බවත් අමතර භට පිරිස් කඳවුර වෙත යවා ඇති බව සඳහන් වේ.

මෙනකා කඳවුර වෙත එල්ලවූ ප්‍රහාරයෙන් පසුව  හමුදා පවුල් වල සාමාජිකයන් විසින් මාලි අගනුවර වන බමාකෝහි විරෝධතාවයන් ආරම්බ කර ඇතැයි වාර්තා වේ.

ඥාතීන් පවසන්නේ ජිහාදි කණ්ඩායම් වල පිරිස් බලය වැඩි හෙයින් හමුදා භටයින්ට භූමියේ ප්‍රමාණවත් ආරක්ෂාවක් නොමැති බවයි.

පසුගිය මාසයේ මාලි සොල්දාදුවන් වෙත එල්ල කළ මෙවැනිම ප්‍රහාර දෙකකින් සොල්දාදුවන් 41දෙනකු මියගොස් 20දෙනකු අතුරුදන් විය.

මාලි දේශයේ 2012 වර්ෂයේ සිට ප්‍රචණ්ඩ ක්‍රියා පවතින අතර ඉස්ලාම් සටන්කාමීන් විසින් අත්පත් කරගෙන තිබූ උතුරු ප්‍රදේශ ප්‍රංශයේ සහාය ඇතිව මුදවා ගැනීමට හැකිවිය.

කෙසේවුවද මේ වනවිට ජිහාඩ් කණ්ඩායම් එම ප්‍රදේශ වල ක්‍රියාකාරීව සිටින බව මාධ්‍ය වාර්තා කර ඇත.

(ඩේලි මේල් ඇසුරිණි - 085)