( තිළිණි ද සිල්වා )

මෙවර ජපානයේ ටෝකියෝහිදී පැවැති 2020 ලෝක ඔලිම්පික් තරගයට සහභාගිවීමෙන් ශ්‍රි ලංකාව දැක් වූ මානව සහයෝගිතාව සම්බන්ධයෙන් ජපානය සතුටු වන බව ශ්‍රි ලංකාවේ ජපාන තානාපති අකිරා සුජියාමා මහතා විදේශ අමාත්‍ය දිනේෂ් ගූණවර්ධන මහතා හමුවී සඳහන් කළේය.

ජපාන තානාපති අකිරා සුජියාමා මහතා විදේශ කටයුතු අමාත්‍යාංශයේදී විදේශ අමාත්‍යවරයා හමුවූ අතර එහිදී තානාපතිවරයා මේ බව කියා සිටියේය.

මෙහි දී විදේශ අමාත්‍ය ගුණවර්ධන මහතා ජපන් තානාපතිවරයාට පවසා සිටියේ කොව්ඩි 19 වසංගතයෙන් ශ්‍රි ලාංකික ජනතාව මුදවා ගැනීම සදහා ශ්‍රි ලංකා ජනාධිපති ගෝඨාභය රාජපක්ෂ මහතා ජපාන අගමැතිවරයා ගෙන් ඉල්ලීම අනුව ඇස්ට්‍රාසෙනිකා එන්නත් මිලියන 1.45 ක් පරිත්‍යාග කිරිම පිළිබදව ශ්‍රි ලංකා රජයේ මෙන්ම ජනතාව ගේ කෘතඥතාව ජපාන රජයට මෙන්ම එරට ජනතාවටද හිමි වන බවය.

ශ්‍රි ලංකාවට පරිත්‍යාග කළ එන්නත් ඉතා කඩිනමින් ජනතාවට ලබා දීමට ශ්‍රි ලංකා රජය ක්‍රියාත්මක කළ ක්ෂණික වැඩ පිළිවල සම්බන්ධයෙන් ජපාන රජය බලවත් සේ සතුටු වන බව මෙහිදී ජපාන තානාපතිවරයා සඳහන් කළේය.