මහ බැංකු අධිපතිගේ ධුර කාලය ජුනි 30 වැනිදායින් අවසන් වන බව දැන දැනත් එම තනතුර සඳහා සුදුස්සකු පත් කිරීමට ආණ්ඩුව තවමත් අපහොසත් වී ඇතැයි ලංකා ගුරු සංගමයේ ලේකම් ජෝසප් ස්ටාලින් මහතා අද මරදාන සීඑස්ආර්හිදි පැවැති මාධ්‍ය හමුවක දී පැවසීය.

පුරවැසි බලය සංවිධානය එම මාධ්‍ය හමුව කැඳවා තිබිණි.

තිස්වැනිදායින් හිටපු මහ බැංකු අධිපතිගේ ධුරකාලය අවසන් වූ බැවින් මේ වන විට එම ධුරය හිස්ව පවතින බවත්, පැය කිහිපයක් ඇතුළත අධිපතිවරයකු පත් කරන බව බදාදා පැවසුවත් බ්‍රහස්පතින්දා වන විට එය දින කිහිපයක් දක්වා කල් ගොස් තිබූ බවත් ස්ටාලින් මහතා කීවේය.

මීට පෙර මහ බැංකු අධිපතිවරුන් මෙන් දේශපාලන පත්වීමක් නොකර සුදුස්සකු වහා එම තනතුරට පත් කළ යුතු බව ද ඔහු සඳහන් කළේය.

මහාචාර්ය සරත් විජේසූරිය, ගාමිණී වියන්ගොඩ සහ දිලිප් රෝහණ මහත්වරු ද මාධ්‍ය සාකච්ඡාවේදී අදහස් දැක්වූහ.