ජනපති නිල වෙබ් අඩවිය  සිකුරාදා සවස අක්‍රීය කරන්නට ඇත්තේ ශ්‍රී ලංකාවේම හැකරුන් කණ්ඩායමක් යැයි රහස් පොලිසිය හා ශ්‍රී ලංකා පරිගණක හදිසි ප්‍රතිචාර සංසදය කියයි.  හැකර් ප්‍රහාරයෙන් පැය කිහිපයකට පසු වෙබ් අඩවිය යථා තත්ත්වයට පත් කළ බවත් එය දැන් සුපුරුදු පරිදි ක්‍රියාත්මක වන බවත් ජනපති කාර්යයාලය කියයි.

අගෝස්තු 25 වැනි සිකුරාදා මේ වෙබ් අඩවියේ පණිවුඩ මකා ශ්‍රී ලංකා තරුණයන් නමින් හඳුන්වාගත් පිරිසක් ඔවුන්ගේ පණිවිඩයක් සිංහලෙන් එහි ඇතුලත් කර ඇතැයි ද මෙම වෙබ් අඩිවිය හැකර් ප්‍රහාරයකට ලක් වී ඇතැයි දැනගත් වහාම ජනපති කාර්යයාලය නිසි පියවර ගෙන ඇතැයි ද එහි ප්‍රකාශකයෙක් කියයි.

අපොස උසස්පෙළ අප්‍රේල් මාසයේ නොතබන ලෙසත් ජනපතිට රට පාලනය කළ නොහැකි නම් ජනාධිපතිවරණයක් පවත්වන ලෙසත් සරසවි සිසුන්ගේ ප්‍රශ්න විසඳීමට වැඩිපුර අවධානය යොමු කරන ලෙසත් අගමැතිගේ ඇතැම් ක්‍රියා නවත්වන ලෙසත් එම කණ්ඩායම ජනපති වෙබ් අඩවියට බලෙන් ඇතුළු වී පළ කළ දැන්වීමේ සඳහන් වේ.

ජනපති වෙබ් අඩවියට මුල් ප්‍රහාරය බ්‍රහස්පතින්දාත් දෙවැනි ප්‍රහාරය සිකුරාදාත් එල්ල වී ඇති බවත් එම ප්‍රහාරයෙන් පැය කිහිපයකට පසු වෙබ් අඩවිය යථා තත්වයට පත් කළ බවත් රජයේ සයිබර් විශේෂඥයෝ පවසති.

බංගලිදේශයේ හැකරකු පැය කිහිපයක් ජනපති වෙබ් අඩවිය තම පාලනයේ නතු කර ගෙන ඉන් පසු ඔහු ඉවත්ව ගිය බව සඳහන්ව ඇතත් එය නොමග යැවීමක් සඳහා සිදු කරන ලද්දක් බව ජනාධිපති කාර්යයාලය පවසයි.