(අංජුල මහික වීරරත්න සහ සුජිත් හේවාජුලිගේ)

ජාත්‍යන්තර වශයෙන් ප්‍රශස්ත ගනුදෙනුවක් තිබෙන බවට පුරසාරම් දොඩවන වර්තමාන ජනාධිපතිවරයා හරහා රටට සුබදායී ගනුදෙනුවකට යාමට ජාත්‍යන්තර මූල්‍ය අරමුදල එකඟ කරවා ගැනීමට නොහැකි වූයේ මන්දැයි විපක්ෂ නායක සජිත් ප්‍රේමදාස මහතා පාර්ලිමේන්තුවේදී ප්‍රශ්න කළේය.

මහ බැංකු අධිපතිවරයාම නිකුත් කළ වාර්තාව අනුව මීට වඩා ලිහිල් කොන්දේසි යටතේ මේ ගනුදෙනුව ලබාගත හැකිව තිබූ බවද විපක්ෂ නායකවරයා පැවසීය.

ජනතාවගේ මුදල් පිළිබඳව තීන්දු ගැනීමට ඉදිරිපත්ව සිටින්නේ ජනතාවගේ මුදල් ගසා කෑ සහ අවභාවිතා කළ ආයතන විසින් බවද විපක්ෂ නායක සජිත් ප්‍රේමදාස මහතා කීය.

අද ණය ප්‍රතිව්‍යුහගතකරණයක් ගැන කතා කරන්නට සිදුව ඇත්තේ පොහොට්ටු ආණ්ඩුවේ සහ පොහොට්ටුවේ ජනාධිපතිවරයාගේ ක්‍රියාකලාපය නිසා බව ද විපක්ෂ නායකවරයා පැවසීය. දේශීය ණය ප්‍රතිව්‍යුහගතකරණය පිළිබඳ පාර්ලිමේන්තු විවාදය අමතමින් සජිත් ප්‍රේමදාස මහතා මේ බව කීය.