(අංජුල මහික වීරරත්න සහ සුජිත් හේවාජුලිගේ)

ජනාධිපතිවරයා සහ අගමැතිවරයා ඉවත් වුවහොත් ප්‍රශ්න විසඳාගැනීම සඳහා පාර්ලිමේන්තුවේ ටික කලකට යම් එකඟතාවයකට පැමිණීමට සූදානම් බව කොළඹ දිස්ත්‍රික් මන්ත්‍රී අනුර දිසානායක මහතා පාර්ලිමේන්තුවේදී අද (4)පැවසීය.

.රට විනාශ කළ අර්බුදයේ උරුමකරුවන් මුලසුනේ තබාගෙන හදන සර්ව පාක්ෂික ආණ්ඩුවලට සූදානම් නැතැයි ද අනුර දිසානායක මහතා වැඩිදුරටත් කීය.

වර්තමානයේ  පැමිණ ඇත්තේ වෙස්වලා ගත් ආශිර්වාදයක් බව මුදල් ඇමැති පැවැසූ බවත් මෙය වෙස්වලා ගත් මාරාන්තික ආශිර්වාදයක් වන අතර  වෙස් වලාගෙන වත් මෙවැනි ආශිර්වාද නොපැමිණේවා යි ප්‍රාර්ථනා කරන බවද අනුර දිසානායක මහතා කීය.

වත්මන් අර්බුදයට කරුණු පහක් මූලික වී ඇතැයි ද හීන වෙමින් තිබෙන ආදායම් පංගුව වැඩි කර ගැනීමට සැලසුමක් නොතිබීම, ආනයන අපනයන පරතරය විසඳාගැනීමට දැක්මක් නොතිබීම, ජන ජීවිතය සමඟ බැඳුණු සංවර්ධන මාවතකට අසමත් වීම මෙන්ම රටේ නිෂ්පාදන කර්මාන්ත ගොඩනැංවීම සඳහා කිසිදු සැලැස්මක් නොතිබීම නිසා රට ආගාධයට ගොස් තිබෙන බවද අනුර දිසානායක මහතා සඳහන් කළේය.

එමෙන්ම රටේ ජාතික නිෂ්පාදනය  සාධාරණ ලෙස බෙදෙන්නේ නැතැයි ද රටේ ඉහළම 10% ජාතික ධනයෙන් 38% ක් භුක්ති විඳින අතර පහලම 10% ජාතික ධනයෙන් භුක්ති විදින්නේ සියයට එකක් පමණක් බවද අනුර දිසානායක මහතා කීය.