(අංජුල මහික වීරරත්න)

කොළඹ කොටුව, වැතම් වීදියේ ඉඩම් කොටසක් 99 අවුරුදු බදු පදනම මත බැහැර කිරීම සඳහා ආයෝජන යෝජනා කැඳවීමට කැබිනට් අනුමැතිය ලැබී ඇත .

කොළඹ කොටුව, වැතම් වීදියෙහි පිහිටි නාගරික සංවර්ධන අධිකාරිය සතු රූඩ් 02 පර්චස් 14.7 ක ඉඩම් කොටසක් 99 අවුරුදු බදු පදනම මත මිශ්‍ර සංවර්ධන ව්‍යාපෘතියක් ක්‍රියාත්මක කිරීම සඳහා 2024 වර්ෂයේදී ආයෝජන යෝජනා කැඳවීමට කටයුතු කරනු ලැබ ඇතත්, ඒ සඳහා කිසිදු ආයෝජකයෙකු ඉදිරිපත්ව නොමැත.

එබැවින්, ප්‍රශස්ත භාවිතයක් මඟින් මෙරට ආර්ථික සංවර්ධනය සඳහා දායකත්වයක් ලබා දීමේ අරමුණින් එකී ඉඩම් කොටස සඳහා පෞද්ගලික අංශයේ ආයෝජකයන් වෙතින් නැවත සංවර්ධන යෝජනා කැඳවීමට නාගරික සංවර්ධන අධිකාරිය විසින් සැලසුම් කර ඇත.

ඒ අනුව, එකී ඉඩම් කොටස, රජයේ ප්‍රධාන තක්සේරුකරුගේ තක්සේරුව මත පදනම්ව, මිශ්‍ර සංවර්ධන ව්‍යාපෘතියක් ක්‍රියාත්මක කිරීම සඳහා වසර 99 ක කාලයකට බදු පදනමින් ලබා දීමට හැකි වන පරිදි රජයේ ප්‍රසම්පාදන මාර්ගෝපදේශ අනුගමනය කරමින් ආයෝජන යෝජනා කැඳවීම පිණිස ප්‍රවාහය, මහා මාර්ග සහ නාගරික සංවර්ධන අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.