(විමුක්ති එස් රුද්‍රිගු)

පසුගිය ඔක්තෝබර් මස 7 වැනිදා හමාස් සටන්කාමීන් ඊශ්‍රායලයට එල්ල කළ ප්‍රහාරයත් සමඟ ආරම්භ වූ ඊශ්‍රායල හමුදා ප්‍රහාර හමුවේ දිනකට පලස්තීන ළමුන් 180 ක් ඝාතනයට ලක්වී ඇතැයි පලස්තීන සෞඛ්‍ය අමාත්‍යංශය ප්‍රකාශ කළේය.

ඊශ්‍රායල හමුදා එල්ල කරන අමානුෂික ගුවන් ප්‍රහාර හමුවේ ඊයේ (7) අවසන් වූ මසක කාලය තුළ පලස්තීන ළමුන් 4237 දෙනකු ඝාතනයට ලක්වී ඇති බවත් තවත් ළමුන් 1350 දෙනකු අතුරුදන් වී ඇති බවත් පලස්තීන සෞඛ්‍ය අමාත්‍යංශය පෙන්වා දී ඇත.අතුරුදන් වී සිටින ළමුන් 1350 දෙනා ඊශ්‍රායල හමුදා බෝම්බ හෙළීමෙන් විනාශ වූ ගොඩනැගිලිවල සුන්බුන් අතර සිරවී සිටින බව විශ්වාස කරන බවත් ඉන් බොහෝ දෙනා මේ වනවිටත් මියගොස් ඇතැයි අනුමාන කරන බවත්  පලස්තීන සෞඛ්‍ය අමාත්‍යංශය පවසයි.

ඒ අනුව ඊයේ(07) අවසන් වූ මසක කාලය තුළ ඊශ්‍රායල හමුදාවේ අමානුෂික ප්‍රහාර හමුවේ පලස්තීන ළමුන් 5500 ක් මියගොස් ඇතැයි පලස්තීන සෞඛ්‍ය අමාත්‍යංශය පෙන්වා දෙයි.එය 1967 වසරේ සිට පසුගිය ඔක්තෝබර් මස 7 වැනිදා දක්වා කාලය තුළ බටහිර ඉවුරේදී සහ ගාසා තිරයේදී ඊශ්‍රායල හමුදා අතින් ඝාතනය වූ ළමුන් සංඛ්‍යාව මෙන් දෙගුණයක් බවද  පලස්තීන සෞඛ්‍ය අමාත්‍යංශය ප්‍රකාශ කළේය.

කම්පන සහගත වේගයකින් ඊශ්‍රායල හමුදා පලස්තීන ළමුන් මරා දමද්දී බෝම්බ ප්‍රහාර අවසන් කිරීමට ඊශ්‍රායලයට බල කිරීමට ලෝක නායකයන්ට ශක්තියක් නොමැති බව ඔවුන් දිනෙන් දින ක්‍රියාකාරීව පෙන්නුම් කර ඇතැයි පලස්තීනයේ ජාත්‍යන්තර ළමා ආරක්‍ෂාව පිළිබඳ සංවිධානයේ වගවීමේ වැඩසටහන් අධ්‍යක්ෂ අයෙඩ් අබූ ප්‍රකාශ කර ඇත. බෝම්බ ප්‍රහාර අවසන් කිරීමට ඊශ්‍රායලයට බල කිරීම ලෝක නායකයන්ට දැක්විය හැකි අවම මානුෂීය ප්‍රතිචාරය බවද ඔහු පෙන්වා දුන්නේය.

ගාසා තීරයේ නේවාසික ගොඩනැගිලි සහ රෝහල්, පාසල්, බේකරි වැනි සිවිල් යටිතල පහසුකම් වලට ඊශ්‍රායල හමුදා සෘජුව ප්‍රහාර එල්ල කරන බැවින් තවත් මරණ සංඛ්‍යාව ඉහළ යා හැකි බව අයෙඩ් අබූ සඳහන් කර ඇත.

ගාසා තීරය ළමුන්ගේ සොහොන් බිමක් වී ඇති බවත් දිනකට ළමුන් විශාල පිරිසක් තුවාල ලැබීමට හෝ මිය යාමට ලක්වන බවත් එක්සත් ජාතීන්ගේ සංවිධානයේ මහ ලේකම් ඇන්ටෝනියෝ ගුටරේස් පසුගියදා ප්‍රකාශ කළේය.ඉන්ධන නොමැති වුවහොත් යන්ත්‍ර මත යැපෙන අලුත උපන් සහ රෝගී දරුවන් මිය යා හැකි යැයි ඔහු පැවසුවේය.

අල් - රන්ටිසි ළමා රෝහලට ප්‍රහාරයක් එල්ල වීමට ඉඩ තිබීම හේතුවෙන් එහි රෝගී දරුවන් ඉවත් කරගන්නා ලෙස ඊශ්‍රායල බලධාරීන් දැනුම් දී තිබුණත් මේ වන විටත් එම රෝහල තිබෙන ප්‍රදේශයට දෙවරක් ඊශ්‍රායල හමුදාවේ ගුවන් ප්‍රහාර එල්ල වී ඇතැයි පලස්තීන සෞඛ්‍ය අමාත්‍යංශය පෙන්වා දුන්නේය.