කොස්ගම සාලාව යුද හමුදා කඳවුරේ අවි ගබඩාවේ සිදුවූ පිපිරීමෙන් කිලෝ මීටරයක් ඇතුළත නිවාස තුන්සියයක් පමණ හා කර්මාන්ත ශාලා දෙකක් සම්පූර්ණයෙන් විනාශ වී ඇතැයි සීතාවක ප්‍රාදේශීය ලේකම් එම්.එම්.එස්.කේ.බණ්ඩාර මාපා මහතා පවසයි.

සාලාව, කළුඅග්ගල, සුදුවැල්ල, මාවිල්ගම, කඩුගොඩ උතුර, අකරවිට, බැන්ඩිගම්පොළ, පහළ කොස්ගම බටහිර, නැගෙනහිර හා මුරුගගම ග්‍රාම සේවා වසම් දහයට දැඩි හානි සිදුවී ඇති අතර කිලෝමීටර් පහක් ඇතුළත තවත් ග්‍රාම සේවා වසම් අටක නිවාස රැසකට ද හානි සිදුවී ඇතැයි ප්‍රාදේශීය ලේකම්වරයා කීය.

සාලාව කඳවුර ආසන්නයේ කිලෝ මීටරයක් ඇතුළත 18628 දෙනකු අවතැන්ව ඇතැයිද ඔහු පැවසීය.

අවතැන්වූවන් පාසල්, පන්සල් හා පෞද්ගලික ස්ථාන ඇතුළු කඳවුරු 11ක නවාතැන් ගෙන ඇතැයිද බණ්ඩාර මාපා මහතා කියයි.

අවැතැන් වූ පිරිස් වෙනුවෙන් සියලු පහසුකම් සැලසීමට කටයුතු යොදා ඇතැයිද ඒ මහතා කීවේය.